ന്യൂഡല്‍ഹി: ലോക്‌സഭാ തിരഞ്ഞെടുപ്പില്‍ സീറ്റ് നിഷേധിച്ചതില്‍ പരസ്യമായി പ്രതിഷേധിച്ച് മുതിര്‍ന്ന കോണ്‍ഗ്രസ് നേതാവും എറണാകുളം സിറ്റിങ് എം.പിയുമായ കെ.വി തോമസ്. ഹൈബി ഈഡന്‍ എം.എല്‍.എയാണ് എറണാകുളത്ത് മത്സരിക്കുന്നത്.

ഞാനൊരിക്കലും പ്രതീക്ഷിക്കാത്ത തീരുമാനമാണിത്. ഒരു സൂചന പോലുമില്ലാതെയാണ് തന്നെ ഒഴിവാക്കിയത്. അതാണ് തന്നെ കൂടുതല്‍ വിഷമിപ്പിച്ചത്. താന്‍ ഞെട്ടലിലാണ്. കൂടുതല്‍ തീരുമാനങ്ങള്‍ ആലോചിച്ചിട്ടില്ലെന്നും പാര്‍ട്ടിക്ക് തന്നെ വേണ്ടങ്കിലും ജനസേവന പ്രവര്‍ത്തനങ്ങളുമായി മുന്നോട്ടു പോവുമെന്നും അദ്ദേഹം പറഞ്ഞു.

താനൊരു ഗ്രൂപ്പിലുമില്ല, ഒരു ഗ്രൂപ്പിലും ആകാന്‍ ആഗ്രഹിക്കുന്നുമില്ല.
മറ്റുള്ള സിറ്റിങ് എം.പിമാരില്‍ നിന്ന് എന്ത് അയോഗ്യതയാണ് തനിക്കുമാത്രമായുള്ളതെന്ന് പാര്‍ട്ടിയാണ് പറയേണ്ടതെന്നും പ്രായം കൂടിയത് തന്റെ തെറ്റല്ലെന്നും അദ്ദേഹം കൂട്ടിച്ചേര്‍ത്തു.

കോണ്‍ഗ്രസിന്റെ സിറ്റിങ് എം.പിമാരില്‍ കെ.വി തോമസിനുമാത്രമാണ് സീറ്റ് നിഷേധിച്ചത്.