ന്യൂഡല്‍ഹി: വയനാട്, ആറ്റിങ്ങല്‍, ആലപ്പുഴ, വടകര എന്നീ നാലു മണ്ഡലങ്ങളെ മാറ്റി നിര്‍ത്തി 12 മണ്ഡലങ്ങളിലേക്കുള്ള കോണ്‍ഗ്രസ് സ്ഥാനാര്‍ഥിപട്ടികയില്‍ തീരുമാനമായി.
സിറ്റിങ് എംപിമാരില്‍ ഭൂരിഭാഗം പേര്‍ക്കും വീണ്ടും സീറ്റു നല്‍കിയപ്പോള്‍ കെ.വി തോമസിനെ ഒഴിവാക്കി. പകരം എറണാകുളത്ത് ഹൈബി ഈഡന്‍ മത്സരിക്കും.

സിറ്റിങ് എംപിമാരായ മുല്ലപ്പള്ളി രാമചന്ദ്രന്‍, കെ.സി വേണുഗോപാല്‍ എന്നിവര്‍ മത്സരിക്കാനില്ലെന്ന് നേരത്തെ വ്യക്തമാക്കിയിരുന്നു.

വയനാട്, ആറ്റിങ്ങല്‍, ആലപ്പുഴ, വടകര മണ്ഡലങ്ങളിലെ സ്ഥാനാര്‍ഥികളെ ഇന്ന് പ്രഖ്യാപിച്ചേക്കും.
സോണിയ ഗാന്ധിയുടെ വസതിയില്‍ ചേര്‍ന്ന കേന്ദ്ര തെരഞ്ഞെടുപ്പു സമിതി യോഗത്തിനു ശേഷമാണ് മുല്ലപ്പള്ളിയും രമേശ് ചെന്നിത്തലയും മാധ്യമങ്ങളെ കണ്ടത്.
കൂടുതല്‍ ചര്‍ച്ചകള്‍ ആവശ്യമായതിനാലാണ് നാലു മണ്ഡലങ്ങളെ മാറ്റി നിര്‍ത്തുന്നതെന്ന് രമേശ് ചെന്നിത്തല പറഞ്ഞു.

ഉമ്മന്‍ ചാണ്ടിയുമായി യാതൊരു അഭിപ്രായവ്യത്യാസവുമില്ല. ഏകകണ്ഠമായ തീരുമാനാണ് ഉണ്ടായത്. കേരളത്തിലെ കോണ്‍ഗ്രസ് ഒറ്റക്കെട്ടാണെന്നും അദ്ദേഹം വ്യക്തമാക്കി.

ശശി തരൂര്‍ (തിരുവനന്തപുരം), ആന്റോ ആന്റണി (പത്തനംതിട്ട), കൊടിക്കുന്നില്‍ സുരേഷ് (മാവേലിക്കര), ഡീന്‍ കുര്യാക്കോസ് (ഇടുക്കി), ഹൈബി ഈഡന്‍ (എറണാകുളം), ബെന്നി ബെഹനാന്‍ (ചാലക്കുടി)

ടി.എന്‍ പ്രതാപന്‍ (തൃശൂര്‍), വി.കെ ശ്രീകണ്ഠന്‍ (പാലക്കാട്), രമ്യ ഹരിദാസ് (ആലത്തൂര്‍), എം.കെ രാഘവന്‍ (കോഴിക്കോട്), കെ.സുധാകരന്‍ (കണ്ണൂര്‍), രാജ്‌മോഹന്‍ ഉണ്ണിത്താന്‍ (കാസര്‍കോട്)