മാഡ്രിഡ്: ഒരിടവേളക്ക് ശേഷം ടീമിന്റെ ഭാഗമായ സിനദീന്‍ സിദാന്‍ ജയത്തോടെ തുടങ്ങി. ഇന്നലെ ലാലിഗയില്‍ നടന്ന മത്സരത്തില്‍ സെല്‍റ്റാവിഗോയെ എതിരില്ലാത്ത രണ്ട് ഗോളുകള്‍ക്കായിരുന്നു റയല്‍ മാഡ്രിഡ് തകര്‍ത്തത്. 62-ാം മിനുട്ടില്‍ ഇസ്‌കോയും 77-ാം മിനുട്ടില്‍ ഗരത് ബെയിലുമാണ് റയലിന് വേണ്ടി ഗോള്‍ കണ്ടെത്തിയത്. സിദാന്‍ അമരത്തെത്തിയതോടെ ടീമില്‍ പല മാറ്റങ്ങളുമായിട്ടായിരുന്നു ഇന്നലെ മത്സരത്തിനിറങ്ങിയത്. കൊര്‍ട്ടോക്ക് പകരം നവാസിനെ കൊണ്ട് വന്നു. ഇസ്‌കോയേയും ഗരത് ബെയിലിനിനെയും ആദ്യ ഇലവനില്‍ ഉള്‍പ്പെടുത്തി. ടീം ഒത്തിണക്കത്തോടെയുള്ള കളിയും പുറത്തെടുത്തു. സെല്‍റ്റാവിഗോക്ക് മേല്‍ പൂര്‍ണ ആധിപത്യം നേടാനും റയലിനായി. ടീമിന്റെ ഒത്തിണക്കം തിരിച്ചുവന്നപോലെയായിരുന്നു ഇന്നലെ നടന്ന മത്സരം. ജയത്തോടെ 54 പോയിന്റുമായി റയല്‍ പട്ടികയില്‍ മൂന്നാം സ്ഥാനത്താണ്. റയല്‍ സോസിഡാഡും ലെവന്റെയും തമ്മിലുള്ള മത്സരം 1-1 ന്റെ സമനിലയില്‍ അവസാനിച്ചു. മറ്റൊരു മത്സരത്തില്‍ അലാവെസ് 3-1ന് ഹുയസ്‌കയെ തകര്‍ത്തു.
ലെസ്റ്ററിന് ജയം
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ലസ്റ്റര്‍ സിറ്റിക്ക് ജയം. 2-1 എന്ന സ്‌കോറിന് ബേണ്‍ലിയേയാണ് ലെസ്റ്റര്‍ സിറ്റി പരാജയപ്പെടുത്തിയത്. നാലാം മിനുട്ടില്‍ ലെസ്റ്റര്‍ താരം ഹാരി മഗൗര്‍ ചുവപ്പ് കാര്‍ഡ് കണ്ട് പുറത്തായി. ലെസ്റ്റര്‍ പത്ത് പേരായി ചുരുങ്ങിയിട്ടും ബേണ്‍ലിക്ക് അവസരം മുതലെടുക്കാനായില്ല. മറ്റൊരു മത്സരത്തില്‍ വെസ്റ്റ് ഹാം 4-3ന് ഹഡേഴ്‌സ്ഫീല്‍ഡിനെ പരാജയപ്പെടുത്തി. ഇന്നലെ നടക്കേണ്ടിയിരുന്ന വാട്‌ഫോര്‍ഡ്-സതാംപ്ടണ്‍, വോള്‍വ്‌സ്- ആഴ്‌സനല്‍, ബ്രിങ്ടണ്‍-കാര്‍ഡിഫ് സിറ്റി, ടോട്ടനം-ക്രിസ്റ്റല്‍ പാലസ് എന്നീ മത്സരങ്ങള്‍ നീട്ടിവെച്ചു. ഇന്ന് രാത്രി 7.45ന് ലിവര്‍പൂള്‍ ഫുള്‍ഹാമിനെ നേരിടും. മറ്റൊരു മത്സരത്തില്‍ രാത്രി 10ന് ചെല്‍സി എവര്‍ട്ടനെയും നേരിടും.