'

'

മലപ്പുറം: വായ്പാ വിതരണത്തില്‍ 2017-18 വര്‍ഷത്തില്‍ ജില്ലയിലെ ബാങ്കുകള്‍ ടാര്‍ജറ്റും കടന്നു മുന്നേറിയതായി ബാങ്കിങ് അവലോകന സമിതി വിലയിരുത്തി. കൃഷി, വ്യവസായം, ഹൗസിങ്, വിദ്യാഭ്യാസം തുടങ്ങിയ മേഖലകളില്‍ 10,298 കോടി രൂപയായിരുന്നു വായ്പയായി നല്‍കാന്‍ ബാങ്കുകള്‍ ലക്ഷ്യമിട്ടിരുന്നത്. എന്നാല്‍, സാമ്പത്തിക വര്‍ഷത്തിന്റെ അവസാനമായപ്പോഴേക്കും 12,262 കോടി രൂപ വിതരണം ചെയ്ു.
119 ശതമാനമാണ് ആകെ നേട്ടം. കാര്‍ഷിക രംഗത്ത് 4,280 കോടി രൂപ ലക്ഷ്യമിട്ടപ്പോള്‍ 5,891 കോടി രൂപ വിതരണം ചെയ്യാന്‍ കഴിഞ്ഞു. വ്യവസായ മേഖലയില്‍ 1,383 കോടി ലക്ഷ്യമിട്ടപ്പോള്‍ 1, 461 കോടി രൂപയാണ് നല്‍കിയത്. വിദ്യാഭ്യാസം, ഹൗസിങ് വായ്പകള്‍ക്കായി 1,411 കോടി രൂപ വിതരണം ചെയ്തു. 1,362 കോടി രൂപയായിരുന്നു ലക്ഷ്യമിട്ടത്.
അവലോകന യോഗം പി. ഉബൈദുല്ല എം.എല്‍.എ ഉദ്ഘാടനം ചെയ്തു. വിദേശത്തുനിന്നു തിരികെവരുന്നവര്‍ക്കു പുനരധിവാസത്തിനു ബാങ്കുകള്‍ പ്രത്യേക പാക്കേജുകള്‍ തയാറാക്കണമെന്ന് അദ്ദേഹം ആവശ്യപ്പെട്ടു.
വ്യവസായ മേഖലയില്‍ സര്‍ക്കാര്‍ കൂടുതല്‍ ഉദാര നയം നടപ്പാക്കുന്നതുപോലെ ബാങ്കുകളും വ്യവസായങ്ങള്‍ക്കു വായ്പ നല്‍കുന്നതില്‍ ഉദാര നയം സ്വീകരിക്കണമെന്നു ചടങ്ങില്‍ മുഖ്യപ്രഭാഷണം നടത്തിയ ജില്ലാ കലക്ടര്‍ അമിത്മീണ പറഞ്ഞു.
ജില്ലയിലെ ബാങ്കുകളില്‍ 2018 മാര്‍ച്ച് വരെയുള്ള കണക്ക് പ്രകാരം 31,838 കോടി രൂപ നിക്ഷേപമായുണ്ട്. പ്രവാസികളുടെ നിക്ഷേപമായി 9,797 കോടി രൂപയുണ്ട്. വായ്പയായി 20,316 കോടി രൂപ നല്‍കിയിട്ടുണ്ട്.
വായ്പാ നിക്ഷേപാനുപാതം 64 ശതമാനമാണ്. പരിപാടി കനറാ ബാങ്ക് എ.ജി.എം എം. ജലീല്‍, ആര്‍.ബി.ഐ എല്‍.ഡി.ഒ ഹരിദാസ്, നബാര്‍ഡ് ഡി.ഡി.എം ജെയിംസ് പി. ജോര്‍ജ്, ലീഡ് ബാങ്ക് മാനേജര്‍ കുഞ്ഞിരാമന്‍ സംസാരിച്ചു.