കല്‍പ്പറ്റ: കാരാപ്പുഴ ഡാമില്‍ കുളിക്കാനിറങ്ങിയ സംഘത്തിലെ യുവാവ് മുങ്ങിമരിച്ചു. വടുവഞ്ചാല്‍ അമ്പലകുന്ന് സ്വദേശി മംഗലത്ത് ഉണ്ണികൃഷ്ണന്റെ മകന്‍ സന്ദീപ്(35) ആണ് മരിച്ചത്. നെല്ലാറച്ചാല്‍ ചീപ്രംകുന്നിന് സമീപം ഇന്നലെ വൈകിട്ട് ആറോടെയാണ് സംഭവം.
ഡാം കാണാനെത്തിയ ഒന്‍പത് അംഗ സംഘത്തില്‍പ്പെട്ടയാളാണ് സന്ദീപ്. ഇവര്‍ കുളിക്കാനിറങ്ങിയപ്പോള്‍ അപകടത്തില്‍പ്പെടുകയായിരുന്നുവെന്നാണ് വിവരം.
സന്ദീപിനെ ഡാമില്‍ കാണാതായ വിവരം ഒപ്പമുള്ളവര്‍ അറിയിച്ചതിനെ തുടര്‍ന്ന് നാട്ടുകാര്‍ അമ്പലവയല്‍ പൊലിസിലും ഫയര്‍ഫോഴ്‌സിലും വിവരമറിയിച്ചു.
തുടര്‍ന്ന് ഫയര്‍ഫോഴ്‌സ് എത്തി ഡാമില്‍ തിരച്ചില്‍ നടത്തി ഏഴരയോടെ മൃതദേഹം കണ്ടെടുക്കുകയായിരുന്നു. ഭാര്യ:ബിന്ദു.