മലപ്പുറം: ലോക്‌സഭാ തെരഞ്ഞെടുപ്പില്‍ മത്സരം നടക്കുന്നത് ഏകാധിപത്യവും ജനാധിപത്യവും തമ്മിലാണെന്ന് മുന്‍ മുഖ്യമന്ത്രി ഉമ്മന്‍ചാണ്ടി പറഞ്ഞു. മലപ്പുറം പാര്‍ലമെന്റ് മണ്ഡലം യു.ഡി.എഫ് കണ്‍വന്‍ഷനില്‍ സംസാരിക്കുകയായിരുന്നു അദ്ദേഹം. ജനാധിപത്യത്തിന്റെ അടിസ്ഥാനമായ സഹിഷ്ണുത നരേന്ദ്രമോദിക്കില്ല. താന്‍ ഇഷ്ടപ്പെടാത്തതൊന്നും കേള്‍ക്കാനോ ചെയ്യാനോ തയാറാകാത്ത നിലപാടാണ് അദ്ദേഹം സ്വീകരിക്കുന്നത്. ഇത് ഏകാധിപത്യത്തിന്റെ തുടക്കമാണ്. ഈ തെരഞ്ഞെടുപ്പില്‍ വലിയ ഉത്തരവാദിത്വമാണ് ജനാധിപത്യ വിശ്വാസികള്‍ക്ക് നിര്‍വഹിക്കാനുള്ളതെന്നും അദ്ദേഹം പറഞ്ഞു.

മലപ്പുറത്ത് കുഞ്ഞാലിക്കുട്ടിയുടെ വിജയം തീര്‍ച്ചയാണെന്നും ഭൂരിപക്ഷം എത്ര കൂടും എന്നതുമാത്രമാണ് ചര്‍ച്ചയെന്നും സി.പി.എമ്മിന്റെ അക്രമരാഷ്ട്രീയത്തിനെതിരേ പൊതുജനങ്ങള്‍ വിധിയെഴുതുമെന്നും അദ്ദേഹം പറഞ്ഞു.