ക്രൈസ്റ്റ് ചര്‍ച്ച്: വംശവെറി പൂണ്ട് അക്രമി കണ്ണില്‍ കണ്ടവരെയെല്ലാം തുരുതുരാ വെടിവച്ചപ്പോള്‍ ടാക്‌സി ഡ്രൈവറായ അബ്ദുല്‍ ഖാദര്‍ അബാബോറയെ രക്ഷിച്ചത് പള്ളിയിലെ ഖുര്‍ആന്‍ ഷെല്‍ഫ്.
കൊലയാളി പള്ളിയിലെത്തിയതോടെ ഓടി അടുത്തുകണ്ട ഖുര്‍ആന്‍ വെക്കുന്ന ബുക് ഷെല്‍ഫിനു താഴെ ഒളിക്കുകയായിരുന്നു. അക്രമി പോയശേഷം എഴുന്നേറ്റു നോക്കിയപ്പോള്‍ തന്റെ ഇരുവശവും മൃതദേഹങ്ങള്‍ ചിതറികിടക്കുകയായിരുന്നു. രക്ഷപ്പെട്ടത് ഖാദറിന് വിശ്വസിക്കാനാവുന്നില്ല. എത്യോപ്യക്കാരനായ ഈ 48കാരന്‍ 2010ലാണ് നഗരത്തിലെത്തിയത്. ഇമാം ഖുതുബയുടെ ഇംഗ്ലിഷ് തര്‍ജമ പറഞ്ഞു തുടങ്ങുന്നേ ഉണ്ടായിരുന്നുള്ളൂ. അപ്പോഴാണ് അക്രമി ഇരച്ചെത്തിയത്. മറ്റൊരു ഫലസ്തീനി ടാക്‌സി ഡ്രൈവര്‍ ഓടുന്നതിനിടെ വെടിയേറ്റു വീണത് താന്‍ കണ്ടതായും ഖാദര്‍ പറയുന്നു.