കൊല്ലം: യുവാവിനെ കസ്റ്റഡിയിലെടുത്ത് മര്‍ദിച്ച് മാനസികാരോഗ്യ കേന്ദ്രത്തിലാക്കിയെന്ന പരാതിയില്‍ പൊലിസിനെതിരേ മനുഷ്യാവകാശ കമ്മിഷന്‍ അന്വേഷണത്തിന് ഉത്തരവിട്ടു.
കുന്നിക്കോട് സ്വദേശി നല്‍കിയ പരാതിയിലാണ് കമ്മിഷനംഗം കെ.മോഹന്‍കുമാറിന്റെ ഉത്തരവ്. കൊല്ലം റൂറല്‍ ജില്ലാ പൊലിസ് സൂപ്രണ്ട് അന്വേഷണം നടത്തി നടപടി സ്വീകരിക്കണമെന്നാണ് ഉത്തരവില്‍ പറയുന്നത്.
കുന്നിക്കോട് എസ്.ഐയും പൊലിസുകാരും ചേര്‍ന്ന് ക്രൂരമായി പീഡിപ്പിച്ച് സെല്ലിലിട്ടെന്നും വെള്ളം ചോദിച്ചിട്ട് കൊടുത്തില്ലെന്നും അവശനായപ്പോള്‍ പിതാവിനെയും മാതാവിനേയും വിളിച്ചുവരുത്തി തിരുവനന്തപുരം ഊളന്‍പാറ മാസികാരോഗ്യകേന്ദ്രത്തില്‍ അയച്ചെന്നും യുവാവ് പരാതിയില്‍ പറയുന്നു. രണ്ടാഴ്ച നിരീക്ഷിച്ചിട്ടും കാര്യമായ അസുഖമില്ലെന്ന് കണ്ട ആശുപത്രി അധികൃതര്‍ യുവാവിനെ പറഞ്ഞുവിടുകയും ചെയ്തു. ബന്ധുവും രാഷ്ട്രീയ നേതാവുമായ വ്യക്തിയാണ് പൊലിസിനെ സ്വാധീനിച്ച് ഇത് ചെയ്യിച്ചതെന്നും പരാതിയില്‍ പറയുന്നു.
കമ്മിഷന്‍ പത്തനാപുരം പൊലിസ് ഇന്‍സ്‌പെക്ടറില്‍ നിന്ന് റിപ്പോര്‍ട്ട് തേടിയിരുന്നു. പിതാവിന്റെ പരാതിയിലാണ് പരാതിക്കാരനെ കസ്റ്റഡിയിലെടുത്തതെന്നും പിതാവാണ് പരാതിക്കാരനെ മാനസികാരോഗ്യകേന്ദ്രത്തിലെത്തിച്ചതെന്നും റിപ്പോര്‍ട്ടില്‍ പറയുന്നു.
കുന്നിക്കോട് പൊലിസ് രജിസ്റ്റര്‍ ചെയ്ത കേസിന്റെ എഫ്.ഐ.ആറും പൊലിസ് ഹാജരാക്കി. എന്നാല്‍ പൊലിസ് റിപ്പോര്‍ട്ടിലെ പരാമര്‍ശങ്ങള്‍ പരാതിക്കാരന്‍ നിഷേധിച്ചു. രാഷ്ട്രീയക്കാരനായ ബന്ധുവാണ് പിതാവിനെക്കൊണ്ട് തനിക്കെതിരേ പരാതി നല്‍കിച്ചതെന്ന് പരാതിക്കാരന്‍ കമ്മിഷനെ അറിയിച്ചു. തനിക്ക് സംഭവിച്ച പീഡനങ്ങളെക്കുറിച്ചുള്ള പരാതിക്കാരന്റെ വാദങ്ങള്‍ പൂര്‍ണമായും തള്ളിക്കളയാനാവില്ലെന്ന് കമ്മിഷന്‍ ഉത്തരവില്‍ പറഞ്ഞു.
പരിധിയില്‍ കവിഞ്ഞ ബലപ്രയോഗം നടന്നോയെന്നും പരാതിക്കാരനെ മാനസികരോഗിയാക്കാന്‍ ശ്രമിച്ചോയെന്നുമുള്ള കാര്യങ്ങളില്‍ അന്വേഷണം വേണമെന്ന് കമ്മിഷന്‍ ഉത്തരവില്‍ ആവശ്യപ്പെട്ടു.