കരിന്തളം: ഇന്നലെ വൈകിട്ട് ആറോടെ വീശിയടിച്ച കാറ്റില്‍ കിനാനൂര്‍-കരിന്തളം പഞ്ചായത്തില്‍ വ്യാപക നാശം.  ഒരു വീടും തൊഴുത്തും പൂര്‍ണമായും രണ്ടു വീടുകള്‍ ഭാഗികമായും തകര്‍ന്നു. കൃഷി നാശവുമുണ്ട്. കോളംകുളത്തെ റജി മാത്യുവിന്റെ വീടും സി.വി സുധാകരന്റെ പശുത്തൊഴുത്തുമാണ് പൂര്‍ണമായി തകര്‍ന്നത്. സി.ബി ഫ്രാന്‍സിസ്, നകുലന്‍ കോളംകുളം എന്നിവരുടെ വീടുകള്‍ ഭാഗികമായി തകര്‍ന്നു. കെ നാരായണന്റെ 40 റബറും കടപുഴകി. ബിരിക്കുളം, പുലിയംകുളം, കൂടോല്‍ , ചേമ്പേന, മയ്യങ്ങാനം, കൊട്ടമടല്‍ പ്രദേശങ്ങളിലും വ്യാപക നാശനഷ്ടമുണ്ട്. നിരവധി വാഴ, തെങ്ങ്, കമുക്, പ്ലാവ്, റബര്‍ തുടങ്ങിയവയും കടപുഴകി. മരങ്ങള്‍ കടപുഴകി വീണു പഞ്ചായത്തിലെ വൈദ്യുത ബന്ധവും താറുമാറായി.