മലപ്പുറം: കേരളാ പ്രീമിയര്‍ ലീഗ് ഫുട്‌ബോളിലെ കേരളാ പൊലിസിന്റെ  ഹോം മത്സരങ്ങള്‍ നാളെ കോട്ടപ്പടി മൈതാനത്ത് ആരംഭിക്കും. വൈകിട്ട് ഏഴിനു നടക്കുന്ന ആദ്യ മത്സരത്തില്‍ കേരളാ പൊലിസ് എഫ്.സി തൃശൂരിനെ നേരിടും. ഉത്തര മേഖലാ ഡി.ജി.പി രാജേഷ് ദിവാന്‍ ഉദ്ഘാടനം ചെയ്യും.
സിനിമാതാരം ജയസൂര്യ മുഖ്യാതിഥിയായും ജില്ലാ പൊലിസ് മേധാവി ദേബേഷ് കുമാര്‍ ബെഹ്‌റ, ഫുട്‌ബോള്‍ താരങ്ങളായ ഐ.എം വിജയന്‍, യു. ഷറഫലി, കുരികേശ് മാത്യു തുടങ്ങിയവരും സംബന്ധിക്കും. മത്സരത്തിന്റെ മുന്നോടിയായുള്ള പ്രദര്‍ശന മത്സരം ഇന്നു നടക്കും.
മലപ്പുറം ജില്ലാ വനിതാ ഫുട്‌ബോള്‍ ടീമും കോഴിക്കോട് ജില്ലാ വനിതാ ഫുട്‌ബോള്‍ ടീമും തമ്മിലാണ് പ്രദര്‍ശന മത്സരം. കേരള പൊലിസിനൊപ്പം ഗോകുലം എഫ്.സിയുടെയും ഹോംമാച്ചുകള്‍ കോട്ടപ്പടിയിലാണ് നടക്കുക.
കേരളാ പൊലിസിന്റെയും ഗോകുലം എഫ്.സിയുടെയും ഹോം മത്സരങ്ങളുടെ സീസണ്‍ ടിക്കറ്റ് വിതരണം ഇന്നലെ ടൂര്‍ണമെന്റ് കമ്മിറ്റി കണ്‍വീനര്‍ യു. ഷറഫലി മലപ്പുറം സോക്കര്‍ ക്ലബ് ചെയര്‍മാന്‍ പി.കെ കുഞ്ഞാന് നല്‍കി ഉദ്ഘാടനം ചെയ്തു. ചടങ്ങില്‍ കെ.വി. പ്രഭാകരന്‍, ടി.ടി അബ്ദുള്‍ ജബ്ബാര്‍ പങ്കെടുത്തു.