മട്ടന്നൂര്‍: ചെങ്കല്‍ ക്വാറികളിലെ പരിശോധനയുടെ മറവില്‍ അന്യായ നടപടി കൈക്കൊള്ളുന്ന റവന്യൂ ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കണമെന്ന് ഇ.പി. ജയരാജന്‍ എം.എല്‍.എ.
മട്ടന്നൂര്‍ നിയോജക മണ്ഡലത്തിലെ പടിയൂരിലെ ചില ചെങ്കല്‍ ക്വാറികളിലെത്തി ഇരിട്ടി താലൂക്ക് ഓഫിസിലെ ചില ഉദ്യോഗസ്ഥര്‍ നിയമവിരുദ്ധ നടപടികളാണ് സ്വീകരിക്കുന്നത്. ജിയോളജിയുടേത് ഉള്‍പ്പെടെ എല്ലാ അനുമതികളുമുള്ള ക്വാറിയിലെത്തി പ്രവൃത്തി തടസപ്പെടുത്തി ലോറികള്‍ പിടിച്ചെടുത്തു. ചെങ്കല്‍ കയറ്റാന്‍ എല്ലാവിധ പെര്‍മിറ്റുകളുള്ള ലോറികളും പിടിച്ചെടുത്ത് ഉടമകളെയും തൊഴിലാളികളെയും പീഡിപ്പിക്കുകയാണ് ഉദ്യോഗസ്ഥര്‍.
നിയമാനുസൃതം ആവശ്യമായ എല്ലാ രേഖകള്‍ കാണിച്ചിട്ടും വാഹനം വിട്ടു കൊടുക്കാന്‍ തയ്യാറാവുന്നില്ല. ഒരു ഡെപ്യൂട്ടി തഹസില്‍ദാറാണ് ഇതിനുപിന്നിലെന്നും അദ്ദേഹം ആരോപിച്ചു. ചെങ്കല്‍ ക്വാറികളുടെ പരിശോധനയുടെ മറവില്‍ അഴിമതി നടത്താനുള്ള നീക്കമാണ് ചില ഉദ്യോഗസ്ഥര്‍ നടത്തുന്നതെന്നാണ് വ്യാപകമായ പരാതി. ചെങ്കല്‍ ക്വാറികളിലെ പരിശോധനയുമായി ബന്ധപ്പെട്ട് നിരന്തരം പരാതികളുയരുകയാണ്. രേഖകളുണ്ടായിട്ടും വാഹനങ്ങള്‍ വിട്ടു കൊടുക്കാതെ പൊലിസ് സ്റ്റേഷനില്‍ തുരുമ്പെടുത്ത് നശിക്കുകയാണ്.
സര്‍ക്കാര്‍ നിലാപാടിന് വിരുദ്ധമായി പ്രവര്‍ത്തിക്കുന്ന ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കാന്‍ റവന്യൂ അധികൃതര്‍ തയ്യാറാകണമെന്നും അദ്ദേഹം ആവശ്യപ്പെട്ടു.