നാസിക്: മഹാരാഷ്ട്രയിലെ നാസിക്കില്‍ സുഖോയ് യുദ്ധവിമാനം തകര്‍ന്നു വീണു. പൈലറ്റുമാര്‍ രണ്ടു പേരും രക്ഷപ്പെട്ടു. നാസിക്കിലെ വ്യോമകേന്ദ്രത്തില്‍ നിന്ന് പറന്നുയര്‍ന്ന വിമാനം 25 കിലോമീറ്റര്‍ അകലെയുള്ള വാവി തുഷി ഗ്രാമത്തിലാണ് വീണത്.
ഇന്നലെ രാവിലെ 11.15 ഓടെയാണ് സംഭവം. പുതുതായി നിര്‍മിച്ച വിമാനമാണ് തകര്‍ന്നത്. പരീക്ഷണ പറക്കല്‍ നടത്തുകയായിരുന്ന വിമാനം സൈന്യത്തിന് കൈമാറിയിരുന്നില്ല. തകരാനുള്ള കാരണം അറിവായിട്ടില്ല. ഈ വര്‍ഷം അവസാനത്തോടെ സൈന്യത്തിന് കൈമാറാനിരുന്ന വിമാനങ്ങളില്‍ പെട്ടതാണിത്. 300 കോടി രൂപ ചെലവിട്ടാണ് 12 സുഖോയ് വിമാനങ്ങള്‍ സൈന്യത്തിനായി ഹിന്ദുസ്ഥാന്‍ എയ്‌റോ നോട്ടിക്‌സ് നിര്‍മിക്കുന്നത്. വിമാനം തകര്‍ന്ന് വീണ പാടത്ത് പണിയെടുക്കുകയായിരുന്ന ചില തൊഴിലാളികള്‍ക്ക് അവശിഷ്ടങ്ങള്‍ പതിച്ച് പരുക്കേറ്റിട്ടുണ്ട്.