കൊച്ചി: സെവന്‍സ് ഫുട്‌ബോളിന് ഗോവയില്‍ പ്രൊഫഷണല്‍ ലീഗ് ആരംഭിക്കുന്നു. മുന്‍നിരക്കാരായ സാല്‍ഗോക്കര്‍, ഡെംപോ, ചര്‍ച്ചില്‍ ബ്രദേഴ്‌സ് ടീമുകള്‍ അണിനിരക്കുന്ന ഗോവന്‍ സെവന്‍സ് പ്രീമിയര്‍ ലീഗിന് ഈ മാസാവസാനം പന്തുരുളും. മഡ്ഗാവിലെ ഫത്തോര്‍ഡ സ്റ്റേഡിയത്തോട് ചേര്‍ന്ന് സജ്ജമാക്കുന്ന പ്രത്യേക വേദിയിലാണ് ഗോവയിലെ ആദ്യ സെവന്‍സ് മാമാങ്കം അരങ്ങേറുന്നത്. ഗോവ ഫുട്‌ബോള്‍ അസോസിയേഷന്റെ പിന്തുണയോടെ ഗോവ സെവന്‍സ് ആണ് ലീഗ് സംഘടിപ്പിക്കുന്നത്. കേരളത്തില്‍ സെവന്‍സ് പ്രീമിയര്‍ ലീഗ് (എസ്.പി.എല്‍) സംഘടിപ്പിക്കുന്ന എന്‍ സ്‌പോര്‍ട്‌സാണ് ലീഗിന്റെ കസള്‍ട്ടന്റും, സ്ട്രാറ്റജിക് പങ്കാളിയും.
ഏപ്രില്‍ 30ന് ലെജന്‍ഡ്‌സ് ഓഫ് കേരളയും, ഗോവ ലെജന്‍ഡ്‌സും തമ്മിലുള്ള പ്രദര്‍ശന മത്സരത്തോടെയാണ് ലീഗിന്റെ തുടക്കം. ഐ.എം വിജയന്‍, സിവി പാപ്പച്ചന്‍, യു ഷറഫലി, ജോപോള്‍ അഞ്ചേരി, കുരികേശ് മാത്യു തുടങ്ങി കേരളത്തിലെ എക്കാലത്തെയും മികച്ച താരങ്ങളാണ് ലെജന്‍ഡ്‌സ് ഓഫ് കേരളയ്ക്കായി കളിക്കുക. കേരള സെവന്‍സിന്റെ അതേ നിയമാവലിയാണ് ഗോവ സെവന്‍സും പിന്തുടരുന്നത്. മെയ് 14 നാണ് ഫൈനല്‍.