തിരുവനന്തപുരം: സംസ്ഥാനത്ത് ലോക്ക് ഡൗണിന്റെ ഭാഗമായി അടച്ചിട്ടിരുന്ന 10 റിസര്‍വേഷന്‍ കൗണ്ടറുകള്‍ കൂടി റെയില്‍വേ തുറന്നു.
തൃശൂര്‍, ആലുവ, എറണാകുളം ടൗണ്‍, ആലപ്പുഴ, കോട്ടയം, തിരുവല്ല, ചെങ്ങന്നൂര്‍, കായംകുളം, കൊല്ലം, പാലക്കാട് എന്നീ റെയില്‍വേ സ്റ്റേഷനുകളിലാണ് ഇന്നലെ കൗണ്ടറുകള്‍ പ്രവര്‍ത്തനക്ഷമമായത്. ഈ സ്‌റ്റേഷനുകളില്‍ രാവിലെ ഒന്‍പതുമുതല്‍ വൈകിട്ട് അഞ്ചുവരെയായിരിക്കും റിസര്‍വേഷന്‍ കൗണ്ടറുകള്‍ തുറന്നുപ്രവര്‍ത്തിക്കുക.
ജൂണ്‍ ഒന്ന് മുതലുള്ള പ്രത്യേക സര്‍വിസുകള്‍ക്ക് വേണ്ടി ടിക്കറ്റ് ബുക്ക് ചെയ്യുന്നതിന് തിരുവനന്തപുരം, എറണാകുളം സൗത്ത്, കോഴിക്കോട് എന്നിവിടങ്ങളിലാണ് നേരത്തെ കൗണ്ടറുകള്‍ പ്രവര്‍ത്തിച്ചിരുന്നത്. തിരുവനന്തപുരം സെന്‍ട്രല്‍ സ്‌റ്റേഷനിലും എറണാകുളം സൗത്തിലും രാവിലെ 8 മുതല്‍ രാത്രി എട്ടുവരെ കൗണ്ടറുകള്‍ തുറന്നുപ്രവര്‍ത്തിക്കും.