പൊന്നാനി: നഗരസഭ നാലു വര്‍ഷം മുന്‍പ് വാങ്ങിയ മാലിന്യം നീക്കം ചെയ്യാന്‍ ഉപയോഗിക്കുന്ന ഗുഡ്‌സ് ഓട്ടോ കട്ടപ്പുറത്ത് കിടന്ന് നശിക്കുന്നു. ഹൈഡ്രോളിക് സംവിധാനത്തോട് കൂടിയ ഗുഡ്‌സ് വാഹനമാണ് ഒരിക്കല്‍ പോലും ഉപയോഗിക്കാതെ ഫയര്‍ഫോഴ്‌സിന്റെ ഗോഡൗണില്‍ കിടന്ന് നശിക്കുന്നത് .
ഡ്രൈവര്‍മാര്‍ ഇല്ലെന്ന് പറഞ്ഞാണ് അഞ്ച് ലക്ഷം രൂപ മുടക്കി വാങ്ങിയ വാഹനം ഒരിക്കല്‍ പോലും ഉപയോഗിക്കാതെ ഉപേക്ഷിച്ചത്. വാഹനത്തിന്റെ ടയര്‍ പൂര്‍ണമായും നശിച്ച നിലയിലാണ് . മറ്റു ഭാഗങ്ങളാകട്ടെ തുരുമ്പെടുത്ത് തുടങ്ങി.
വലിയ ലോറി കടന്ന് പോകാത്ത ഇടുങ്ങിയ വഴികളില്‍ നിന്നും മാലിന്യം ശേഖരിക്കാനാണ് ഭരണ സമിതി തുടക്കത്തില്‍ ലക്ഷങ്ങള്‍ ചെലവഴിച്ച് വാഹനം വാങ്ങിയത് .എന്നാല്‍ നഗരസഭയുടെ അനാസ്ഥ മൂലം ഇത് നടക്കാതെ പോവുകയായിരുന്നു.
ഫയര്‍ഫോഴ്‌സിന്റെ ഗോഡൗണില്‍ വാഹനം തള്ളിയതു മൂലം മറ്റുവാഹനങ്ങള്‍ പാര്‍ക്ക് ചെയ്യാന്‍ പറ്റാത്ത സ്ഥിതിയാണ് .
നിരവധി തവണ വാഹനം മാറ്റിത്തരണമെന്നാവശ്യപ്പെട്ടിട്ടും നഗരസഭ തയ്യാറായില്ലെന്ന് ഫയര്‍ഫോഴ്‌സ് അധികൃതര്‍ പറയുന്നു. വിവിധയിടങ്ങളില്‍ മാലിന്യം കുമിഞ്ഞ് കൂടിക്കിടക്കുന്ന സാഹചര്യത്തിലാണ് ലക്ഷങ്ങള്‍ മുടക്കി വാങ്ങിയ ആര്‍ക്കും ഉപകാരമില്ലാതെ കിടക്കുന്നത്.