വാഷിങ്ടണ്‍: യു.എസില്‍ കൊവിഡ് മരണം ലക്ഷത്തിനടുത്ത് എത്തിയിരിക്കെ രാജ്യത്തെ നിയന്ത്രണങ്ങള്‍ എടുത്തുകളഞ്ഞ് സാമ്പത്തികരംഗം പുനരുജ്ജീവിപ്പിക്കണമെന്ന് പ്രസിഡന്റ് ട്രംപ് സ്റ്റേറ്റുകള്‍ക്ക് നിര്‍ദേശം നല്‍കി. രാജ്യത്ത് കൊവിഡ് ഉച്ചാവസ്ഥ പിന്നിട്ടെന്നും ലോക്ക്ഡൗണ്‍ പിന്‍വലിക്കണമെന്നും ഏപ്രില്‍ മുതലേ ട്രംപ് ആവശ്യപ്പെടുന്നുണ്ട്. 

അതേസമയം യു.എസില്‍ കൊവിഡ് മരണം ഒരു ലക്ഷത്തോട് അടുക്കുകയാണ്. ജോണ്‍ ഹോപ്കിന്‍സ് യൂനിവേഴ്‌സിറ്റി പഠനപ്രകാരം ഇതുവരെ 98,929 പേരാണ് യു.എസില്‍ മരിച്ചത്. 

ലോകത്തെ ആകെ കൊവിഡ് മരണത്തിന്റെ 28 ശതമാനം വരുമിത്. അതേസമയം മറ്റു ചില റിപ്പോര്‍ട്ടുകളനുസരിച്ച് യു.എസില്‍ മരണം ലക്ഷം പിന്നിട്ടു കഴിഞ്ഞു. 16,81,418 പേര്‍ക്ക് രാജ്യത്ത് വൈറസ് ബാധിച്ചിട്ടുണ്ട്. 

യു.എസിലെ സ്റ്റേറ്റുകളില്‍ കൊവിഡ് ഏറ്റവും ബാധിച്ചിരിക്കുന്നത് ന്യൂയോര്‍ക്കിനെയാണ്. അവിടെ 3,63,836 പേര്‍ക്ക് വൈറസ് പിടിപെട്ടിട്ടുണ്ട്. 29,302 പേര്‍ മരിക്കുകയും ചെയ്തു. 

ന്യൂ ജഴ്‌സി, ഇല്ലിനോയിസ്, കാലിഫോര്‍ണിയ എന്നിവയാണ് തൊട്ടു പിന്നിലുള്ളത്. വാഷിങ്ടണിലാണ് വൈറസ് വ്യാപനം കുറവുള്ളത്. ന്യൂജഴ്‌സിയില്‍ 1,55,764 പേര്‍ക്കും ഇല്ലിനോയിസില്‍ 1,13,195 പേര്‍ക്കുമാണ് വൈറസ് സ്ഥിരീകരിച്ചിട്ടുള്ളത്.  

അതിനിലെ ലോകത്ത് കൊവിഡ് മരണം മൂന്നര ലക്ഷം പിന്നിട്ടു. 55 ലക്ഷത്തിലേറെ പേര്‍ക്ക് രോഗം ബാധിച്ചിട്ടുമുണ്ട്.

 ബ്രസീല്‍ രോഗവ്യാപനത്തില്‍ രണ്ടാമതെത്തിയിരിക്കുകയാണ്. 3,94,507 പേര്‍ക്കാണ് അവിടെ വൈറസ് സ്ഥിരീകരിച്ചിരിക്കുന്നത്. 

മൂന്നാം സ്ഥാനത്തുള്ള റഷ്യയില്‍ 3,70,680 പേര്‍ക്കാണ് രോഗം ബാധിച്ചിട്ടുള്ളത്. ബ്രസീലില്‍ 24,593 പേര്‍ മരിച്ചിട്ടുണ്ട്.