ന്യൂഡല്‍ഹി: ലോക്ക് ഡൗണ്‍ കാലത്തെ കുടിയേറ്റ തൊഴിലാളികളുടെ കേസില്‍ കേന്ദ്ര സര്‍ക്കാറിനെതിരെ രൂക്ഷ വിമര്‍ശനമുയര്‍ത്തി സുപ്രിം കോടതി. വിഷയത്തില്‍ സര്‍ക്കാരിന് കൃത്യമായ നയമില്ലെന്ന ചൂണ്ടിക്കാട്ടിയ കോടതി ഉറച്ച ചുവടുവെപ്പാണ് കേന്ദ്രത്തിന്റെ ഭാഗത്തു നിന്നുണ്ടാവേണ്ടതെന്നും ചൂണ്ടിക്കാട്ടി. 

തൊഴിലാളികളുടെ യാത്രാപ്രശ്‌നമാണ് പ്രധാനമെന്ന് കോടതി നിര്‍ദേശിച്ചു. ദുരിതപരിഹാരത്തിന് കൃത്യമായ പദ്ധതിയില്ലെന്നതാണ് യാഥാര്‍ത്ഥ്യമെന്നും കോടതി നിരീക്ഷിച്ചു. അതിഥി തൊഴിലാളികളെ നാട്ടിലെത്തിക്കില്ലെന്ന് പറയാന്‍ ആര്‍ക്കും അധികാരമില്ലെന്ന് കോടതി കൂട്ടിച്ചേര്‍ത്തു.

മെയ് ഒന്നു മുതല്‍ 91 ലക്ഷം പേരെ നാട്ടിലെത്തിച്ചെന്ന് കേന്ദ്രം കോടതിയെ അറിയിച്ചു. അതേസമയം എല്ലാ തൊഴിലാളികളേയും തിരിച്ചെത്തിക്കാന്‍ ഇനി എത്രകാലമെടുക്കുമെന്ന് കോടതി ചോദിച്ചു.

'തിരിച്ചെത്തിക്കും വരെ ഭക്ഷണവും സൗകര്യങ്ങളും ലഭ്യമാക്കണം. പദ്ധതിയെക്കുറിച്ച് തൊഴിലാളികള്‍ക്ക് അറിവുണ്ടോ? അസാധാരണസാഹചര്യത്തില്‍ അസാധാരണ നടപടി വേണം', കോടതി പറഞ്ഞു.

അതേസമയം അതിഥിതൊഴിലാളികളുടെ വിഷയത്തില്‍ സംസ്ഥാനത്തിന് പിഴവുണ്ടായിട്ടില്ലെന്ന് കേരളം അറിയിച്ചു. കുടിവെള്ളവും ഭക്ഷണവും സൗജന്യമായാണ് നല്‍കിയതെന്ന് കേരളം അറിയിച്ചു.