കോഴിക്കോട്: മഹല്ല് ശാക്തീകരണം, സംസ്‌കരണ പ്രവര്‍ത്തനങ്ങള്‍, സാഹിത്യ പ്രചാരണം, ജീവകാരുണ്യ പ്രവര്‍ത്തനങ്ങള്‍ എന്നിവ ലക്ഷ്യമാക്കി 2015 മുതല്‍ സമസ്ത നടപ്പാക്കിവരുന്ന 'ദഅ്‌വത്തിനൊരു കൈത്താങ്ങ്' പദ്ധതിയുടെ മൂന്നാം ഘട്ട ഫണ്ട് സമാഹരണം വന്‍ വിജയമാക്കാന്‍ സമസ്ത ദഅ്‌വത്തിനൊരു കൈത്താങ്ങ് പദ്ധതി ചെയര്‍മാന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍, സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍, ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് പ്രസിഡന്റ് പി.കെ.പി അബ്ദുസലാം മുസ്‌ലിയാര്‍, ജന. സെക്രട്ടറി എം.ടി അബ്ദുല്ല മുസ്‌ലിയാര്‍, സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ പ്രസിഡന്റ് സി.കെ.എം സ്വാദിഖ് മുസ്‌ലിയാര്‍, ജനറല്‍ സെക്രട്ടറി ഡോ.ബഹാഉദ്ദീന്‍ മുഹമ്മദ് നദ്‌വി അഭ്യര്‍ഥിച്ചു.
മഹല്ല്, മദ്‌റസ കമ്മിറ്റി ഭാരവാഹികളും മുഅല്ലിംകളും സംഘടനാ പ്രവര്‍ത്തകരും അതാത് മഹല്ലുകളില്‍ ഗൃഹസന്ദര്‍ശനം നടത്തിയിരുന്നു. മാര്‍ച്ച് 22ന് വെള്ളിയാഴ്ച പള്ളികള്‍ കേന്ദ്രീകരിച്ചാണ് ഫണ്ട് സമാഹരിക്കുക. പള്ളികളില്‍ ഫണ്ട് സമാഹരിക്കാത്ത പ്രദേശങ്ങളില്‍ 24ന് ഞായറാഴ്ച മദ്‌റസകള്‍ കേന്ദ്രീകരിച്ചാണ് നടത്തുക. സമാഹരിച്ച തുകകള്‍ 25ന് തിങ്കളാഴ്ച റെയ്ഞ്ച് കേന്ദ്രങ്ങളില്‍ വച്ച് റെയ്ഞ്ച് ഭാരവാഹികള്‍ സ്വീകരിക്കുന്നതാണ്. റെയ്ഞ്ചുകള്‍ സമാഹരിച്ച തുക ജില്ലാ കേന്ദ്രങ്ങളില്‍ വച്ച് നിശ്ചിത തിയതികളില്‍ സംസ്ഥാന നേതാക്കള്‍ ഏറ്റുവാങ്ങും.
സമസ്ത കേരള ജംഇയ്യത്തുല്‍ ഉലമായുടെ എക്കാലത്തെയും പ്രവര്‍ത്തനങ്ങള്‍ പോലെ ജനകീയ പങ്കാളിത്തത്തോടെയാണ് ദഅ്‌വത്തിനൊരു കൈത്താങ്ങ് പദ്ധതിക്കുള്ള ഫണ്ട് ശേഖരിക്കുന്നത്. കഴിഞ്ഞ രണ്ട് ഘട്ടങ്ങളിലും നടത്തിയ ഫണ്ട് സമാഹരണം വന്‍ വിജയമായിരുന്നു. നിരവധി ജീവകാരുണ്യ സംസ്‌കരണ പ്രവര്‍ത്തനങ്ങള്‍ക്കും മഹല്ല് ശാക്തീകരണത്തിനും സാഹിത്യ പ്രചാരണങ്ങള്‍ക്കും വേണ്ടിയാണ് ദഅ്‌വത്തിനൊരു കൈത്താങ്ങ് പദ്ധതി ഫണ്ടുകള്‍ വിനിയോഗിക്കുന്നത്.