മലപ്പുറം: ലോക്‌സഭാ തെരഞ്ഞെടുപ്പില്‍ അഞ്ചു മണ്ഡലങ്ങളില്‍ പി .ഡി.പി സ്ഥാനാര്‍ഥികളെ പ്രഖ്യാപിച്ചു. മലപ്പുറം ടൗണ്‍ഹാളില്‍ നടന്ന പാര്‍ട്ടിയുടെ സംസ്ഥാന തെരഞ്ഞെടുപ്പ് നയപ്രഖ്യാപന കണ്‍വന്‍ഷനില്‍ വിഡിയോ കോണ്‍ഫറന്‍സ് വഴി ബംഗളൂരുവില്‍നിന്ന് പാര്‍ട്ടി ചെയര്‍മാന്‍ അബ്ദുന്നാസര്‍ മഅ്ദനിയാണ് സ്ഥാനാര്‍ഥികളെ പ്രഖ്യാപിച്ചത്. പൊന്നാനി, മലപ്പുറം, ആലപ്പുഴ, ചാലക്കുടി, ആറ്റിങ്ങല്‍ മണ്ഡലങ്ങളിലാണ് മത്സരിക്കുക.

പൊന്നാനിയില്‍ പി .ഡി .പി സംസ്ഥാന ഉപാധ്യക്ഷന്‍ പൂന്തുറ സിറാജ്, മലപ്പുറത്ത് സംസ്ഥാന തെരഞ്ഞെടുപ്പ് കമ്മിറ്റി കണ്‍വീനര്‍ നിസാര്‍ മേത്തര്‍, ആലപ്പുഴയില്‍ നയരൂപവല്‍ക്കരണ സമിതി ജനറല്‍ കണ്‍വീനര്‍ വര്‍ക്കല രാജ്, ചാലക്കുടിയില്‍ സംസ്ഥാന ജനറല്‍ സെക്രട്ടറി ടി.എ മുജീബ്‌റഹ്മാന്‍, ആറ്റിങ്ങലില്‍ മാഹീന്‍ തേവരുപാറ എന്നിവര്‍ മത്സരിക്കും. കഴിഞ്ഞ ദിവസം ചേര്‍ന്ന പാര്‍ട്ടി ഉന്നതാധികാര സമിതിയുടെ കൂടിയാലോചനയിലാണ് സ്ഥാനാര്‍ഥി നിര്‍ണയം നടത്തിയത്.

ഫാസിസത്തിനെതിരേയാണ് പി.ഡി.പിയുടെ പോരാട്ടമെന്ന് അബ്ദുന്നാസര്‍ മഅ്ദനി വിഡിയോ കോണ്‍ഫറന്‍സില്‍ പറഞ്ഞു.

മറ്റു മണ്ഡലങ്ങളില്‍ ആര്‍ക്കു പിന്തുണ കൊടുക്കണമെന്ന കാര്യത്തില്‍ പാര്‍ട്ടി പിന്നീട് തീരുമാനമെടുക്കുമെന്ന് പൂന്തുറ സിറാജ് കണ്‍വന്‍ഷനുശേഷം മാധ്യമങ്ങളോട് പറഞ്ഞു.