തിരുവനന്തപുരം: മദ്യം വില്‍ക്കുന്നതിനുള്ള ടോക്കണ്‍ വിതരണം ചെയ്യുന്നതിനുള്ള ബെവ് ക്യൂ ആപ്പ് തുടര്‍ച്ചയായ രണ്ടാം ദിവസവും തകരാറിലായി. കൃത്യമായി ടോക്കണ്‍ വിതരണം ചെയ്യാന്‍ കഴിയാതായതോടെ സംസ്ഥാനത്ത് പലയിടത്തും ബാറുകളിലൂടെ ടോക്കണില്ലാതെ തന്നെ മദ്യം വിതരണം ചെയ്തു. ആപ്പ് കിട്ടുന്നില്ല, ബുക്കിങ്ങ് നടക്കുന്നില്ല, ഒ.ടി.പി ലഭിക്കുന്നില്ല തുടങ്ങി ആദ്യ ദിവസം ഉയര്‍ന്ന പരാതികള്‍ തന്നെയാണ് ഇന്നലെയും ഉണ്ടായത്. ആദ്യ ദിവസത്തെ പ്രശ്‌നങ്ങള്‍ രണ്ടാം ദിനത്തില്‍ പരിഹരിക്കുമെന്നാണ് ആപ്പ് തയാറാക്കിയ ഫെയര്‍ കോഡ് എന്ന കമ്പനി പറഞ്ഞിരുന്നതെങ്കിലും ഇന്നലെയും ഒന്നും ചെയ്യാന്‍ കഴിഞ്ഞില്ല. പ്രശ്‌നങ്ങള്‍ സങ്കീര്‍ണമായതോടെ എക്‌സൈസ് മന്ത്രി ടി.പി.രാമകൃഷ്ണന്‍ ഇന്നലെ ഉന്നതതല യോഗം വിളിച്ച് കാര്യങ്ങള്‍ ചര്‍ച്ച ചെയ്തു. പ്രതിപക്ഷം ഇതിനകം തന്നെ ആരോപണം ഉന്നയിച്ചിരിക്കുന്ന സാഹചര്യത്തില്‍ ആപ്പ് ഉപേക്ഷിക്കുന്നത് വിവാദമാകുമെന്ന് ഭയന്നാണ് അതില്‍നിന്നും പിന്‍മാറാതിരിക്കുന്നത്. ചില സാങ്കേതിക പ്രശ്‌നങ്ങള്‍ പരിഹരിച്ചാല്‍ ആപ്പിന്റെ പ്രവര്‍ത്തനം സുഗമമാകുമെന്നാണ് വിദഗ്ധര്‍ സര്‍ക്കാരിനു നല്‍കിയ ഉപദേശം. ആപ്പിന്റെ പ്രവര്‍ത്തനം പരിശോധിക്കാന്‍ ഐ.ടി. സെക്രട്ടറി എം.ശിവശങ്കറിനെയും സ്റ്റാര്‍ട്ടപ്പ് മിഷന്‍ സി.ഇ.ഒ. സജി ഗോപിനാഥിനെയും യോഗം ചുമതലപ്പെടുത്തുകയും ചെയ്തു. ആപ്പിന്റെ പ്രവര്‍ത്തനവുമായി ബന്ധപ്പെട്ടുണ്ടായ സാങ്കേതിക പരിമിതികളെക്കുറിച്ച് മന്ത്രി ബിവറേജസ് കോര്‍പറേഷനില്‍ നിന്നും സ്റ്റാര്‍ട്ടപ്പ് മിഷനില്‍ നിന്നും വിശദമായ റിപ്പോര്‍ട്ട് ആവശ്യപ്പെട്ടിട്ടുണ്ട്.
ആപ്പിന്റെ പ്രവര്‍ത്തനത്തില്‍ തുടര്‍ച്ചയായി പ്രശ്‌നങ്ങള്‍ വന്നതോടെ ബെവ്‌കോയും നിര്‍മാതാക്കളായ ഫെയര്‍കോഡിനെ അതൃപ്തി അറിയിച്ചിരുന്നു. മെയ് 31, ജൂണ്‍ ഒന്ന് ദിവസങ്ങളില്‍ അവധിയാണ്. ജൂണ്‍ രണ്ടു മുതല്‍ പൂര്‍ണമായ സംവിധാനം ഉപഭോക്താക്കള്‍ക്ക് ലഭ്യമാക്കുമെന്നാണ് ബെവ്‌കോ അറിയിച്ചിരിക്കുന്നത്.