#വി.എം ഷണ്‍മുഖദാസ്

പാലക്കാട്: കുടിവെള്ള മലിനീകരണത്താലും കൃഷിവെള്ള ശോഷണത്താലും പ്ലാച്ചിമടക്കാരുടെ ജീവിതം ദുരിതത്തിലാക്കിയ ബഹുരാഷ്ട്രക്കുത്തകയായ കൊക്കകോളയെ വീണ്ടും പ്ലാച്ചിമടയില്‍ കുടിയിരുത്താനുള്ള നീക്കത്തില്‍ പ്രതിഷേധിച്ച്് കൊക്കകോള വിരുദ്ധസമരക്കാരും ഐക്യദാര്‍ഢ്യസമിതിയും ലോക്‌സഭാ തെരഞ്ഞെടുപ്പ് ബഹിഷ്‌കരിക്കുന്നതുള്‍പെടെയുള്ള സമരപരിപാടികള്‍ക്കൊരുങ്ങുന്നു.

കഴിഞ്ഞ 18 വര്‍ഷമായി പ്ലാച്ചിമട ജനത കുടില്‍കെട്ടി സമരം തുടരുകയാണ്. കേന്ദ്ര, കേരള സര്‍ക്കാരുകള്‍ സമരക്കാര്‍ക്ക് അനുകൂലമായ നിലപാട് സ്വീകരിക്കാത്തതില്‍ പ്രതിഷേധിച്ചാണ് ഇക്കുറി വോട്ട് ബഹിഷ്‌കരണം നടത്താന്‍ പരിപാടിയിട്ടിട്ടുള്ളത്. ഈമാസം 25നു പ്ലാച്ചിമടയില്‍ നടക്കുന്ന പ്രത്യേക കണ്‍വന്‍ഷനില്‍ തെരഞ്ഞെടുപ്പില്‍ എന്തു നിലപാട് സ്വീകരിക്കണമെന്ന് തീരുമാനിക്കുമെന്ന് സമരസമിതി ചെയര്‍മാന്‍ വിളയോടി വേണുഗോപാല്‍ 'സുപ്രഭാത'ത്തോട് പറഞ്ഞു.

കൊക്കകോള കമ്പനിയുടെ പ്രവര്‍ത്തനം മൂലം പ്ലാച്ചിമടക്കാര്‍ക്കുണ്ടായ 216 കോടി രൂപയുടെ നഷ്ടപരിഹാരം വാങ്ങി നല്‍കുന്നതില്‍ കേന്ദ്ര, കേരളസര്‍ക്കാരുകള്‍ അനങ്ങാപ്പാറ നയം സ്വീകരിക്കുകയാണ്. 2011 മെയ് 25ന് അന്നത്തെ അഡീഷനല്‍ ചീഫ് സെക്രട്ടറിയായിരുന്ന കെ. ജയകുമാറിന്റെ നേതൃത്വത്തിലുള്ള ഉന്നതാധികാരസമിതിയാണ് നഷ്ടപരിഹാരത്തുക കണക്കാക്കിയത്്. ഇതിനിടയിലാണ് ഇപ്പോള്‍ കൊക്കകോള കമ്പനി ജനസേവകരായി പുതിയ പദ്ധതികളുമായി പ്ലാച്ചിമടയിലേക്ക് വീണ്ടും എത്തുന്നത്. ഇതിനുവേണ്ട ഒത്താശ നല്‍കാന്‍ കേരള സര്‍ക്കാര്‍ അണിയറയില്‍ നീക്കവും നടത്തുന്നു.

നഷ്ടപരിഹാരം നേടിയെടുക്കാനായി കേരള സര്‍ക്കാര്‍ മുന്‍കൈയെടുത്ത് പ്ലാച്ചിമട നഷ്ടപരിഹാര ട്രൈബ്യൂണല്‍ രൂപീകരിക്കാന്‍ കേരള സര്‍ക്കാര്‍ തീരുമാനിച്ചിരുന്നു. 2010 ജൂണ്‍ 30നാണ് പ്ലാച്ചിമട നഷ്ടപരിഹാര ട്രൈബ്യൂണല്‍ ബില്‍ കൊണ്ടുവരാന്‍ അന്നത്തെ വി.എസ് അച്യുതാനന്ദന്‍ സര്‍ക്കാര്‍ തീരുമാനിച്ചത്. 2011 ഫെബ്രുവരി 23ന് കേരളനിയമസഭ ബില്‍ ഐകകണ്‌ഠേന പാസാക്കി. 2011 മാര്‍ച്ച് 29ന് കേരള ഗവര്‍ണര്‍ ബില്‍ രാഷ്ട്രപതിക്ക് അയച്ചുകൊടുത്തു. ബില്‍ രാഷ്ട്രപതിയുടെ ഓഫിസിലെത്തിക്കാതെ അന്നത്തെ ആഭ്യന്തരമന്ത്രി കെ. ചിദംബരം തടഞ്ഞുവച്ചു. ഇതു കൊക്കകോളയെ സഹായിക്കാനാണെന്ന് സമരസമിതി ആരോപിച്ചിരുന്നു. പിന്നീട് വന്ന എന്‍.ഡി.എ സര്‍ക്കാറും ബില്‍ കേരളത്തിലേക്കു തിരിച്ചയച്ചു. ഇതിനെ തുടര്‍ന്ന് ബില്‍ നിയമ സഭയില്‍ പാസാക്കി കൊക്കകോളയില്‍ നിന്ന് നഷ്ടപരിഹാരം വാങ്ങിക്കൊടുക്കുമെന്ന് പിണറായി സര്‍ക്കാര്‍ സമരസമിതിക്ക് ഉറപ്പു നല്‍കിയെങ്കിലും മൂന്ന് വര്‍ഷമായിട്ടും അതുണ്ടായില്ല. ഇതിനിടയില്‍ സമരസമിതി മുഖ്യമന്ത്രിയുടെ വസതിയിലേക്കും നിയമമന്ത്രി എ.കെ ബാലന്റെ പാലക്കാട്ടെ വസതിയിലേക്കും മാര്‍ച്ച് നടത്തിയിരുന്നു. ഈ സാഹചര്യത്തിലാണ് പ്ലാച്ചിമടക്കാര്‍ തെരഞ്ഞെടുപ്പ് ബഹിഷ്‌കരണം, പാര്‍ട്ടികള്‍ക്കെതിരേ പ്രചാരണം, നോട്ടയ്ക്ക് വോട്ട് തുടങ്ങിയ കാര്യങ്ങള്‍ നടത്താനൊരുങ്ങുന്നത്.