കാസര്‍കോട്: ആര്‍.എസ്.എസുമായും ബി.ജെ.പിയുമായും ആര്‍ക്കാണ് ബന്ധമുള്ളതെന്നത് സംബന്ധിച്ച് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനുമായും മുഖ്യമന്ത്രി പിണറായി വിജയനുമായും സംവാദത്തിന് ഒരുക്കമാണെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍. ഡി.സി.സി ഓഫിസില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. കേട്ടുമടുത്ത പ്രസ്താവന നടത്തി വരികയാണ് സി.പി.എം. തോല്‍വിയില്‍ നിന്നുണ്ടായ പരിഭ്രാന്തിയില്‍ നിന്നാണ് ഇതുണ്ടായത്. 1978ല്‍ കൂത്തുപറമ്പിലും ഉദുമയിലും ആര്‍.എസ്.എസിന്റ ജനസംഘവുമായി സഖ്യമുണ്ടാക്കിയവരാണ് ഇത് പറയുന്നത്.
ഇ.എം.എസ് നമ്പൂതിരിപ്പാടാണ് ഉദുമയില്‍ മാരാര്‍ക്കുവേണ്ടി പ്രചാരണത്തിനെത്തിയത്. പിണറായിയുടെ സുഹൃത്തുക്കളുമുണ്ടായിരുന്നു പ്രസംഗിക്കാന്‍. പാലക്കാട് എല്‍.കെ അദ്വാനിയോടൊപ്പമായിരുന്നു ശിവദാസമേനോന്‍. ബി.ജെ.പിയിലേക്ക് ആളുകള്‍ പോയത് കോണ്‍ഗ്രസില്‍ നിന്നല്ല. ബംഗാളില്‍ സി.പി.എം ഓഫിസുകളില്‍ താമര കൊടിയാണ് പാറുന്നത്. ത്രിപുരയിലേക്കും ബംഗാളിലേക്കും എന്റെ ചെലവില്‍ കോടിയേരിയെ കൊണ്ടുപോകാം. ആരാണ് ബി.ജെ.പിയിലേക്ക് പോയതെന്ന് കാണാം. കാസര്‍കോട് പെരിയ ഇരട്ടക്കൊലക്കേസിലെ അന്വേഷണത്തില്‍ കോണ്‍ഗ്രസിന് അതൃപ്തിയുണ്ടെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ കൂട്ടിച്ചേര്‍ത്തു.
കൊലപാതകം വ്യക്തിപരമായ കാരണത്താലാണെന്ന് വരുത്തിതീര്‍ക്കാനാണ് ശ്രമം. കേസ് സി.ബി.ഐ തന്നെ അന്വേഷിക്കണം. കാസര്‍കോട് മണ്ഡലത്തില്‍ ഒന്നാമത്തെ തെരഞ്ഞെടുപ്പ് വിഷയം പെരിയ ഇരട്ടക്കൊലയാണെന്നും മുല്ലപ്പള്ളി പറഞ്ഞു.