കാസര്‍കോട്: ന്യൂസ്‌ലാന്‍ഡില്‍ നടക്കുന്ന ലോക മാസ്റ്റേഴ്‌സ് ഗെയിംസ് നീന്തല്‍ മത്സരത്തില്‍ വിധികര്‍ത്താവായി ജില്ലയില്‍ നിന്ന് ഒരു പൊലിസുകാരന്‍. മഞ്ചേശ്വരം പൊലിസ് സ്റ്റേഷനിലെ സീനിയര്‍ സിവില്‍ പൊലിസ് ഓഫിസറും നീലേശ്വരം തീര്‍ത്ഥങ്കര സ്വദേശിയും ദേശീയ നീന്തല്‍ താരവുമായ എം.ടി.പി സൈഫുദ്ദീനാണ് ജില്ലയുടെ അഭിമാനമായി നീന്തല്‍ മത്സരത്തിന് മാര്‍ക്കിടാന്‍ ന്യൂസ്‌ലാന്‍ഡിലേക്ക് പറക്കുന്നത്. ഈ മാസം 21 മുതല്‍ 30 വരെ ഓക്‌ലണ്ടിലാണ് മത്സരം. 2015ലെ ദേശീയ ഗെയിംസ് നീന്തല്‍ മത്സരത്തിലും ഇദ്ദേഹം വിധികര്‍ത്താവായിരുന്നു. ഇത് മൂന്നാം തവണയാണ് ലോകോത്തര മത്സരത്തില്‍ വിധി കര്‍ത്താവാകാന്‍ ഇദ്ദേഹത്തിനു അവസരം ലഭിക്കുന്നത്.
സംസ്ഥാന അക്വാട്ടിക് അസോസിയേഷന്‍ ജോയിന്റ് സെക്രട്ടറി കൂടിയായ സൈഫുദ്ദീന്‍ ജനമൈത്രി പൊലിസുമായി ബന്ധപ്പെട്ട് ജില്ലയിലെ പല ഭാഗങ്ങളിലും കുട്ടികള്‍ക്കു നീന്തല്‍ പരിശീലനം നല്‍കി വരുന്നുണ്ട്. ഈയിനത്തില്‍ നൂറു കണക്കിന് ശിഷ്യന്മാരാണ് അദ്ദേഹത്തിനുള്ളത്. പരേതരായ സി.കെ അബ്ദുല്ലയുടെയും എം.ടി.പി സഫിയയുടെയും മകനാണ്. റുഖിയയാണ് ഭാര്യ. മക്കള്‍: റിയാറോസ്, റിസറോസ്.