ന്യൂഡല്‍ഹി: ഇന്ത്യയും ചൈനയും തമ്മില്‍ അതിര്‍ത്തിയില്‍ പ്രശ്‌നങ്ങള്‍ തുടരുന്നതിനിടെ കേന്ദ്രസര്‍ക്കാരിനോട് വീണ്ടും ചോദ്യങ്ങളുമായി രാഹുല്‍ ഗാന്ധി. ചൈനീസ് സൈനികര്‍ ഇന്ത്യന്‍ മണ്ണില്‍ പ്രവേശിച്ചോയെന്ന് സര്‍ക്കാര്‍ വ്യക്തമാക്കണമെന്നാണ് രാഹുല്‍ ആവശ്യപ്പെട്ടത്. അതിര്‍ത്തിയില്‍ നടക്കുന്നത് എന്തെന്ന് സര്‍ക്കാര്‍ ജനങ്ങളെ അറിയിക്കണമെന്ന് നേരത്തെയും അദ്ദേഹം ആവശ്യപ്പെട്ടിരുന്നു.
വലിയതോതില്‍ അതിര്‍ത്തിയില്‍ ചൈനീസ് സൈന്യത്തെ വിന്യസിച്ചെന്ന പ്രതിരോധ മന്ത്രി രാജ്‌നാഥ് സിങ്ങിന്റെ വെളിപ്പെടുത്തലിന് പിന്നാലെയായിരുന്നു ചോദ്യങ്ങളുമായി രാഹുല്‍ ഗാന്ധി രംഗത്തെത്തിയത്. ചൈനയുമായി അതിര്‍ത്തിയില്‍ നടക്കുന്ന അസ്വാരസ്യത്തില്‍ സര്‍ക്കാര്‍ ജനങ്ങളോട് മൗനം പാലിക്കുന്നത് പലവിദത്തിലുള്ള ഊഹോപോഹങ്ങള്‍ക്കു കാരണമാകുമെന്നു നേരത്തെ രാഹുല്‍ വ്യക്തമാക്കിയിരുന്നു.