വളപട്ടണം: കണ്ണൂര്‍ സലീം സ്മാരക വിന്നേഴ്‌സ് സ്വര്‍ണക്കപ്പിനും പോണ്ടിച്ചേരി അഹമ്മദ് സ്മാരക റണ്ണേഴ്‌സ് സ്വര്‍ണക്കപ്പിനും അമ്പതിനായിരം രൂപ പ്രൈസ്  മണിക്കും വേണ്ടിയുള്ള ആറാമത് എ.പി.
എസ് അഖിലേന്ത്യാ സെവന്‍സ് ഫുട്‌ബോള്‍ ടൂര്‍ണമെന്റ് ഫൈനല്‍ ഇന്ന് നടക്കും. രണ്ടാഴ്ചയായി നടന്നുവരുന്ന ഫുട്‌ബോള്‍ ആരവങ്ങള്‍ ഇന്ന് അവസാനിക്കുമ്പോള്‍ പതിനാല് ടീമുകള്‍ മാറ്റുരച്ച ടൂര്‍ണമെന്റിലെ ജേതാക്കള്‍ ആരെന്ന് ഫൈനലിനു ശേഷം വ്യക്തമാകും. കേരള സന്തോഷ് ട്രോഫി താരങ്ങള്‍ അണിനിരക്കുന്ന ടീമുകളാണ് ഇന്ന് ഫൈനലില്‍ കലാശപ്പോരാട്ടത്തില്‍ മത്സരിക്കുന്നത്. നിലവിലെ ജേതാക്കളായ ജെട്ടി ബ്രദേഴ്‌സ് അഴീക്കലും പറശ്ശിനി ബ്രദേഴ്‌സ് പറശ്ശിനിക്കടവും തമ്മിലാണ് സ്വര്‍ണകപ്പിനു വേണ്ടിയുള്ള പോരാട്ടം. വര്‍ഷങ്ങള്‍ക്കു ശേഷം തുല്യശക്തികള്‍ നേര്‍ക്കുനേര്‍ ഇറങ്ങുന്ന മത്സരത്തില്‍ ജയം ആരുടെ കൂടെയെന്ന് ഇന്ന് കണ്ടറിയേണ്ടിവരും.