തിരുവനന്തപുരം: കേരളത്തിലെ രണ്ടാമത്തെ വലിയ ഫാമായ നെല്ലിയാമ്പതി ഓറഞ്ച് ഫാമില്‍ ക്രമക്കേട് നടന്നതായി ഓഡിറ്റ് റിപ്പോര്‍ട്ട്. 2015 മുതല്‍ 2017 ജനുവരി വരെയുള്ള കാലയളവിലെ കണക്കുകള്‍ ഓഡിറ്റ് ചെയ്തപ്പോഴാണ് ക്രമക്കേടുകള്‍ കണ്ടെത്തിയത്. 

ഫാമിലേക്ക് വിതരണം നടത്തിയതായി രേഖയുള്ള 22,490 കിലോ ചകിരിവളം ഫാമില്‍ ഉപയോഗിച്ചതായി തെളിവില്ല. അതിനാല്‍ ഈ തുക സര്‍ക്കാരിലേക്ക് തിരിച്ചടക്കണമെന്ന് ഓഡിറ്റ് റിപ്പോര്‍ട്ടില്‍ നിര്‍ദേശമുണ്ട്.
സ്ഥാപനത്തിന് അനിവാര്യമായ വിവിധ രജിസ്റ്ററുകള്‍ കൃത്യമായി സൂക്ഷിക്കുന്നില്ലെന്നും റിപ്പോര്‍ട്ടില്‍ സൂചിപ്പിക്കുന്നു. ഫാമില്‍ ഉല്‍പാദിപ്പിക്കുന്ന ഉല്‍പ്പന്നങ്ങളുടെ സ്റ്റോക്കും വില്‍പനയും പരിശോധിക്കാന്‍ സാധിക്കുന്നില്ല. ഉല്‍പാദനത്തിന്റെ കണക്കും വില്‍പ്പന നടത്തിയതിന്റെ കണക്കും കൃത്യമായി എഴുതി സൂക്ഷിക്കുന്നില്ല. പഴയ രജിസ്റ്ററുകള്‍ പലതും അപ്രത്യക്ഷമായി.
ഇതെല്ലാം എങ്ങനെ സംഭവിച്ചുവെന്ന ഉദ്യോഗസ്ഥര്‍ക്ക് മറുപടി നല്‍കാന്‍ കഴിയുന്നില്ല. ഇതേത്തുടര്‍ന്ന് നിയമാനുസൃതമായി രജിസ്റ്റര്‍ പരിപാലിക്കാന്‍ വേണ്ട നടപടി ബന്ധപ്പെട്ട ഉദ്യോഗസ്ഥര്‍ കര്‍ശനമായി സ്വീകരിക്കാന്‍ ആഭ്യന്തര അന്വേഷണ വിഭാഗം നിര്‍ദേശം നല്‍കി.
ഫാമില്‍ ടെന്‍ഡര്‍, ക്വട്ടേഷന്‍ രജിസ്റ്ററുകള്‍ സൂക്ഷിക്കുന്നില്ലെന്നും ഓഡിറ്റ് വിഭാഗം കണ്ടെത്തി. സ്റ്റോര്‍ പര്‍ച്ചേസ് ചട്ടപ്രകാരം 5,000 രൂപക്ക് മുകളില്‍ വാങ്ങുന്ന, വില്‍ക്കുന്ന സാധനങ്ങള്‍ ഒരുലക്ഷം വരെയുള്ളത് ക്വട്ടേഷന്‍ പ്രകാരവും അതിന് മുകളില്‍ ടെണ്ടര്‍ പ്രകാരവുമേ പാടുള്ളു. രണ്ടിനും പ്രത്യേകം രജിസ്റ്റര്‍ വേണം. എന്നാല്‍ ഇത്തരം വിവരങ്ങളൊന്നും രേഖപ്പെടുത്തിയിട്ടില്ല. ധാരാളം ഫര്‍ണിച്ചറുകള്‍ ഓഫിസിലുണ്ടെങ്കിലും അതിനും രജിസ്റ്ററില്ലെന്നത് ഗുരുതരവീഴ്ചയാണ്. നാളിതുവരെ ഓഡിറ്റ് ഒബ്ജക്ഷന്‍ രജിസ്റ്റര്‍ ആരംഭിക്കുകയോ പരിപാലിക്കുകയോ ചെയ്തിട്ടില്ല.
പരിശോധനയില്‍ രജിസ്റ്ററുകളില്‍ ആവശ്യമായ രേഖപ്പെടുത്തലുകള്‍ നടത്തിയിട്ടില്ല. ഉല്‍പന്നങ്ങളുടെ ഡെയ്‌ലി ബാലന്‍സ് എഴുതുന്നില്ല. അതിനാല്‍ ഓരോ ദിവസത്തെയും സ്റ്റോക്ക് പരിശോധിക്കാന്‍ നിര്‍വാഹമില്ലെന്നും ഓഡിറ്റ് റിപ്പോര്‍ട്ട് വ്യക്തമാക്കുന്നു.