#സുനി അല്‍ഹാദി

കൊച്ചി: ലോക്‌സഭാ തെരഞ്ഞെടുപ്പ് പ്രചാരണം ചൂടുപിടിച്ചതോടെ സംസ്ഥാനത്തെ പൊലിസുകാര്‍ക്കും വിശ്രമമില്ലാത്ത ഓട്ടം. തെരഞ്ഞെടുപ്പ് പെരുമാറ്റച്ചട്ടം നിലവില്‍വന്നതോടെ നിയമലംഘകരെ കണ്ടെത്താനും കള്ളപ്പണം കണ്ടെത്താനുമൊക്കെ പൊലിസ് നെട്ടോട്ടത്തിലാണ്.

ഒരു ജില്ലയില്‍ ഏറ്റവും കുറഞ്ഞത് ഏഴ് സംഘങ്ങളെയാണ് വാഹനപരിശോധനക്കായി നിയോഗിച്ചിരിക്കുന്നത്. തെരഞ്ഞെടുപ്പിനായി ഏതെങ്കിലും രാഷ്ട്രീയപാര്‍ട്ടികള്‍ക്കോ സ്ഥാനാര്‍ഥികള്‍ക്കോ അനധികൃതമായി പണം വാഹനത്തിലെത്തിക്കുന്നുണ്ടോയെന്ന് കണ്ടെത്തണമെന്നാണ് ഇവര്‍ക്ക് ലഭിച്ചിരിക്കുന്ന നിര്‍ദേശം.
രണ്ട് പൊലിസുകാരും വിഡിയോഗ്രാഫറുമൊക്കെ ഉള്‍പ്പെടുന്ന സംഘം രാവും പകലും കള്ളപ്പണം കണ്ടെത്താന്‍ പരിശോധന നടത്തും. ജില്ലാ അതിര്‍ത്തികളിലും നാഷനല്‍ ഹൈവേകളിലും സന്ദേശം ലഭിക്കുന്ന ഇടങ്ങളിലുമൊക്കെ പരിശോധനയില്‍ ഏര്‍പ്പെടും. ആയിരത്തി അമ്പതോളം വാഹനങ്ങള്‍ ദിവസവും ഇവര്‍ പരിശോധിക്കും. പതിവ് പരിശോധനകളില്‍ നിന്ന് വ്യത്യസ്തമായി വാഹനത്തിന്റെ എല്ലാഭാഗങ്ങളും ഇവര്‍ പരിശോധിക്കണമെന്നാണ് നിര്‍ദേശം.

തെരഞ്ഞെടുപ്പിനെ തുടര്‍ന്ന് എല്‍.പി (ലോങ് പെന്റിങ്) കേസുകളില്‍ അറസ്റ്റ് വാറന്‍ഡ് പുറപ്പെടുവിച്ചതും ഇവരുടെ തിരക്കുകൂട്ടി. തെരഞ്ഞെടുപ്പിന് ക്രമസമാധാനം ഉറപ്പുവരുത്താന്‍ വിവിധ കേസുകളിലെ പിടികിട്ടാപ്പുള്ളികളെ കണ്ടെത്താന്‍ സ്‌ക്വാഡ് രൂപീകരിച്ചായിരിക്കും ഇവരുടെ പ്രവര്‍ത്തനം.

വരുംദിവസങ്ങളില്‍ പ്രചാരണപ്രവര്‍ത്തനം ശക്തമാകുന്നതോടെ കൂടുതല്‍ ദേശീയ നേതാക്കളും കേരളത്തിലെത്തും. ഇതോടെ അകമ്പടി സേവിക്കാനും സുരക്ഷ ഒരുക്കാനുമൊക്കെ കൂടുതല്‍ പൊലിസിനെ നിയോഗിക്കേണ്ടിവരും. തെരഞ്ഞെടുപ്പിനോടനുബന്ധിച്ച് വിവിധ ഡ്യൂട്ടിക്ക് നിയോഗിക്കുന്ന പൊലിസുകാരെ സ്റ്റേഷന്‍ ഡ്യൂട്ടിയില്‍ നിന്ന് ഒഴിവാക്കുമെങ്കിലും അംഗബലം കുറവായതിനാല്‍ സ്റ്റേഷനിലുള്ള മറ്റുള്ളവര്‍ക്ക് ജോലിഭാരം കൂടുന്നതായും പരാതി ഉയര്‍ന്നിട്ടുണ്ട്.

ആവശ്യത്തിന് പൊലിസുകാരില്ലാത്തത് കേസ് അന്വേഷണത്തിന് തടസം സൃഷ്ടിക്കുമ്പോള്‍ കോടതികളിലും കേസ് തീര്‍പ്പാകാതെ മാറ്റിവയ്ക്കപ്പെടുന്നുണ്ട്. സാധാരണ ശബരിമലയില്‍ എല്ലാ മാസവും നടതുറക്കുമ്പോള്‍ പത്തനംതിട്ട ജില്ലയിലെ പൊലിസുകാരെ മാത്രമാണ് നിയോഗിക്കുന്നത്.

എന്നാല്‍, യുവതീപ്രവേശനവുമായി ബന്ധപ്പെട്ട പ്രശ്‌നങ്ങള്‍ നിലനില്‍ക്കുന്നതിനാല്‍ ഇത്തവണ മറ്റ്ജില്ലകളില്‍ നിന്നുകൂടി പൊലിസുകാരെ അങ്ങോട്ടേക്ക് നിയോഗിക്കുന്നുണ്ട്. മയക്കുമരുന്ന് കേസ്, അടിപിടിക്കേസ്, വഴിതര്‍ക്കം,സത്രീ പീഡനം തുടങ്ങി എന്ത് അന്വേഷിക്കാനും പൊലിസ് വേണം.