ന്യൂഡല്‍ഹി: സാമ്പത്തിക തട്ടിപ്പു കേസില്‍ ഛത്തിസ്ഗഡ് മുന്‍മുഖ്യമന്ത്രിയും ബി.ജെ.പി നേതാവുമായ രമണ്‍ സിങ്ങിന്റെ മരുമകനെതിരേ പൊലിസ് കേസെടുത്തു. ഇതു സംബന്ധിച്ച് അന്വേഷണം നടത്താന്‍ നിയോഗിച്ച മൂന്നംഗ ഉദ്യോഗസ്ഥ സമിതിയുടെ റിപ്പോര്‍ട്ടിന്റെ അടിസ്ഥാനത്തിലാണ് റായ്പൂര്‍ ഡി.കെ.എസ് ആശുപത്രിയുടെ മേധാവിയായിരുന്ന പുനീത് ഗുപ്തയ്‌ക്കെതിരേ പൊലിസ് കേസെടുത്തത്.

2016 ജനുവരി മുതല്‍ 2019 ജനുവരി വരെയാണ് ഗുപ്ത ആശുപത്രി മേധാവിയായിരുന്നത്. ഈ കാലത്ത് 50 കോടി രൂപ അനുമതിയില്ലാതെ തിരിമറി നടത്തിയെന്നാണ് 18 പേജുള്ള റിപ്പോര്‍ട്ടില്‍ ആരോപിച്ചിരിക്കുന്നത്. ഈ വര്‍ഷം കോണ്‍ഗ്രസ് അധികാരത്തിലെത്തിയ ശേഷമാണ് പുനീത് ഗുപ്തയെ പദവിയില്‍നിന്ന് പുറത്താക്കിയത്.
തട്ടിപ്പ്, ക്രിമിനല്‍ ഗൂഢാലോചന, വ്യാജരേഖയുണ്ടാക്കല്‍ തുടങ്ങിയ കുറ്റങ്ങള്‍ക്കുള്ള വകുപ്പുകളാണ് ചുമത്തിയിരിക്കുന്നത്. പുതിയ മേധാവിയായി നിയമിക്കപ്പെട്ട ഡോ. കെ.കെ സഹ്‌റെയാണ് ഗുപ്ത തട്ടിപ്പ് നടത്തിയതായി പരാതി നല്‍കിയത്. തുടര്‍ന്ന് സര്‍ക്കാര്‍ അന്വേഷണ സമിതിയെ നിയോഗിക്കുകയായിരുന്നു. 50 കോടി തട്ടിപ്പു നടത്തിയതായും വ്യാജ ഓഡിറ്റ് റിപ്പോര്‍ട്ടുണ്ടാക്കിയതായും പരാതിയില്‍ പറയുന്നു.

യോഗ്യതയില്ലാത്ത നിരവധി പേരെ നിയമിക്കുകയും ചെയ്തിട്ടുണ്ട്.
സര്‍ക്കാരിന്റെ അനുമതിയില്ലാതെ ഗുപ്ത ബാങ്കില്‍നിന്ന് തന്റെ പദവിയുപയോഗിച്ച് വായ്പയെടുത്തതായും സമിതിയുടെ അന്വേഷണത്തില്‍ കണ്ടെത്തി.
പി.ആര്‍ സാന്‍ചെട്ടി ആന്‍ഡ് കമ്പനിയെന്ന പേരിലുള്ള ചാര്‍ട്ടേഡ് അക്കൗണ്ടന്‍സി കമ്പനിയുടെ പേരിലാണ് ഓഡിറ്റ് റിപ്പോര്‍ട്ടുള്ളത്. തങ്ങള്‍ ഓഡിറ്റ് നടത്തിയിട്ടില്ലെന്ന് കമ്പനി വ്യക്തമാക്കി.