ന്യൂഡല്‍ഹി: കൊവിഡ് വ്യാപനത്തെ തുടര്‍ന്ന് രാജ്യം അടച്ചിട്ട സമയത്ത് ലോണുകള്‍ക്കു മൊറട്ടോറിയം പ്രഖ്യാപിച്ച സമയത്തെ പലിശ ഒഴിവാക്കണമെന്ന ആവശ്യത്തില്‍ കേന്ദ്ര ധനകാര്യ മന്ത്രാലയത്തിന്റെ മറുപടി തേടി സുപ്രിംകോടതി. വിഷയത്തില്‍ നേരത്തെ കോടതി റിസര്‍വ് ബാങ്കിന്റെയും കേന്ദ്രസര്‍ക്കാരിന്റെയും മറുപടി ആവശ്യപ്പെട്ടിരുന്നുവെങ്കിലും കേന്ദ്രം മറുപടി സമര്‍പ്പിച്ചിരുന്നില്ല.
എന്നാല്‍, ആ സമയത്തെ പലിശ ഒഴിവാക്കുന്നത് നല്ലതല്ലെന്ന നിലപാടിലാണ് റിസര്‍വ് ബാങ്ക്. ബാങ്കുകള്‍ കടുത്ത സാമ്പത്തിക പ്രശ്‌നം നേരിടുന്ന സമയത്ത് വരെ നിര്‍ബന്ധിച്ച് പലിശ ഒഴിവാക്കാനാവശ്യപ്പെടുന്നത് ശരിയായ തീരുമാനമല്ലെന്നായിരുന്നു റിസര്‍വ് ബാങ്ക് കോടതിയില്‍ വ്യക്തമാക്കിയത്.
തുടര്‍ന്നാണ് കോടതി വീണ്ടും ധനമന്ത്രാലയത്തിന്റെ മറുപടിയും തേടിയത്. ജസ്റ്റിസ് അശോക് ഭൂഷണ്‍, ജസ്റ്റിസ് സഞ്ജയ് കിഷന്‍ കൗള്‍, ജസ്റ്റിസ് എം.ആര്‍ ഷാ എന്നിവരടങ്ങുന്ന ബെഞ്ചാണ് കേസ് പരിഗണിക്കുന്നത്.
ആഗ്ര സ്വദേശിയായ ഗജേന്ദ്ര ശര്‍മ എന്നയാളാണ് വിഷയത്തില്‍ കോടതിയെ സമീപിച്ചിരുന്നത്.
വിഷയത്തില്‍ ധനമന്ത്രാലയത്തിനു മറുപടി നല്‍കാന്‍ സമയം അനുവദിക്കണമെന്ന് സോളിസിറ്റര്‍ ജനറല്‍ തുഷാര്‍ മേത്ത കോടതിയില്‍ ആവശ്യപ്പെടുകയായിരുന്നു.
ഈ മാസം 12നകം മറുപടി സമര്‍പ്പിക്കാനാണ് കോടതി ആവശ്യപ്പെട്ടിരിക്കുന്നത്.