കോഴിക്കോട്: മുദ്രവയ്ക്കാന്‍ കൊണ്ടുപോകുകയായിരുന്ന അരക്കോടി രൂപയുടെ സ്വര്‍ണം കവര്‍ന്നു. ഇന്നലെ രാവിലെ 8.35ന് രാമനാട്ടുകരയില്‍ നിന്നും കോഴിക്കോട്ടേക്കുള്ള ബസ് യാത്രക്കിടെയാണ് ജ്വല്ലറി ജീവനക്കാരനില്‍ നിന്നും 1.68 കിലോ  സ്വര്‍ണം കവര്‍ന്നത്. രാമനാട്ടുകരയിലെ മുബാറക്ക് ജ്വല്ലറിയിലെ ജീവനക്കാരനായ അബ്ദുല്‍ഗഫൂറില്‍ നിന്നാണ് സ്വര്‍ണം നഷ്ടമായത്.
രണ്ടു വര്‍ഷമായി ഗഫൂര്‍ തന്നെയാണ് സ്വര്‍ണം ഹാള്‍മാര്‍ക്കിങിനായി കൊണ്ടുപോകാറുള്ളത്. കെ.എസ്.ആര്‍.ടി.സി ബസിലായിരുന്നു യാത്ര. തിരക്കായതിനാല്‍ ചവിട്ടുപടിക്കും കണ്ടക്ടറുടെ സീറ്റിനുമിടയിലുള്ള സ്ഥലത്ത് ബാഗ് വച്ചത്, ഗഫൂര്‍ തൊട്ടടുത്തുതന്നെ നിന്നു.
ബസ് കോഴിക്കോട് മൊഫ്യൂസില്‍ ബസ്റ്റാന്‍ഡില്‍ എത്തിയ ശേഷം ബാഗുമായി പുറത്തിറിങ്ങി നടക്കുന്നതിനിടെയാണു സ്വര്‍ണം നഷ്ടപ്പെട്ടത് അറിയുന്നത്. തുടര്‍ന്ന് കസബ പൊലിസില്‍ വിവരമറിയിക്കുകയായിരുന്നു. ഗഫൂര്‍ സ്വര്‍ണം മുദ്രവെക്കാന്‍ എത്താറുണ്ടെന്നത് മുന്‍കൂട്ടി അറിയാവുന്ന ആരെങ്കിലുമാണോ കവര്‍ച്ച നടത്തിയതെന്നാണ് പൊലിസ് നിഗമനം.