തൊടുപുഴ: 2.19 ലക്ഷം രൂപയുടെ കള്ളനോട്ടുകളുമായി മൂന്ന് പേര്‍ പൊലിസ് പിടിയില്‍. മുരിക്കാശ്ശേരി വാത്തിക്കുടി സ്വദേശി വെള്ളുകുന്നേല്‍ ലിയോ (സാം -44), കരുനാഗപ്പള്ളി അത്തിനാട് അമ്പിയില്‍ കൃഷ്ണകുമാര്‍(46), പുറ്റടി അച്ചക്കാനം കടിയന്‍കുന്നേല്‍ രവീന്ദ്രന്‍ (58) എന്നിവരെയാണ് അണക്കര പെട്രോള്‍ പമ്പിന് സമീപത്ത് നിന്ന് പിടികൂടിയത്. 

200 രൂപയുടെ 1096 നോട്ടുകളാണ് ഇവരുടെ പക്കല്‍ നിന്ന് കണ്ടെടുത്തത്. കള്ളനോട്ട് കൈമാറുന്നതായി കട്ടപ്പന ഡിവൈ.എസ്.പി എന്‍.സി രാജ്‌മോഹന് ലഭിച്ച ലഭിച്ച രഹസ്യ വിവരത്തിന്റെ അടിസ്ഥാനത്തില്‍ കുമളി സി.ഐ വി.കെ ജയപ്രകാശിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. ഇതുമായി ബന്ധപ്പെട്ട് കൂടുതല്‍ പേര്‍ പിടിയിലാകുമെന്ന് ജില്ലാ പൊലിസ് മേധാവി കെ.ബി വേണുഗോപാല്‍ അറിയിച്ചു.
കട്ടപ്പന, കുമളി സി.ഐ മാരുടെ നേതൃത്വത്തിലുള്ള സംഘത്തിനാണ് അന്വേഷണ ചുമതല. കൃഷ്ണകുമാറും രവീന്ദ്രനും ഇതിന് മുന്‍പ് 38 ലക്ഷം രൂപയുടെ കള്ളനോട്ടുകേസില്‍ പിടിയിലായിട്ടുണ്ട്. യു.എ.പി.എ ചുമത്തപ്പെട്ട് ജയിലിലായിരുന്ന ഇവര്‍ കഴിഞ്ഞ നവംബറിലാണ് പുറത്തിറങ്ങിയത്. രവീന്ദ്രന്‍ കഴിഞ്ഞ 20 വര്‍ഷത്തിനിടെ നിരവധി കള്ളനോട്ട് കേസുകളില്‍ പ്രതിയായിട്ടുണ്ട്.
ഒരു ലക്ഷം രൂപക്ക് 3.5 ലക്ഷം രൂപയുടെ വ്യാജനോട്ടുകളാണ് ഇവര്‍ നല്‍കുന്നതെന്ന് പൊലിസ് പറഞ്ഞു.