മനില: ഫിലിപ്പൈന്‍സില്‍ ബസ് കൊക്കയിലേക്ക് മറിഞ്ഞ് 26 പേര്‍ മരിച്ചു. വടക്കന്‍ ഫിലിപ്പൈന്‍സിലെ പര്‍വതനഗരത്തിലാണ് അപകടം. നൊയേവ എസിജ പ്രവിശ്യയിലെ കരംഗലാന്‍ പട്ടണത്തിലാണ് അപകടമുണ്ടായത്. വടക്കന്‍ ഇസെബെല്ല പ്രവിശ്യയിലെ ഇലോകസ് സൂറില്‍ നിന്ന് വരികയായിരുന്ന ബസാണ് അപകടത്തില്‍പെട്ടത്.
സമീപകാലത്ത് രാജ്യത്തുണ്ടാകുന്ന പ്രധാന റോഡപകടമാണിത്. ബസിലുണ്ടായിരുന്ന 50 യാത്രക്കാരെ രക്ഷപ്പെടുത്തി. 24 മീറ്റര്‍ താഴ്ചയിലേക്കാണ് ബസ് മറിഞ്ഞത്. വടം ഉപയോഗിച്ചാണ് രക്ഷാപ്രവര്‍ത്തനം നടത്തിയത്.
മിക്ക യാത്രക്കാര്‍ക്കും ഗുരുതര പരുക്കേറ്റു. ഇവരെ ആശുപത്രിയില്‍ പ്രവേശിപ്പിച്ചിരിക്കയാണ്. പൊലിസിനൊപ്പം ഗ്രാമീണരും രക്ഷാപ്രവര്‍ത്തനത്തില്‍ ഏര്‍പ്പെട്ടിരുന്നു. ബ്രേക്ക് നഷ്ടപ്പെട്ടതാണ് അപകടകാരണമെന്നാണ് പൊലിസ് നല്‍കുന്ന പ്രാഥമിക വിവരം. ഈ മേഖലയില്‍ സമാന രീതിയില്‍ ആറു അപകടങ്ങള്‍ നടന്നിട്ടുണ്ട്.