താമരശ്ശേരി: സ്വകാര്യ ആശുപത്രിയില്‍ മോഷണം നടത്തിയ തമിഴ്‌നാട് സ്വദേശിയെ പിടികൂടി. പുതുപ്പാടിയില്‍ വാടകക്ക് താമസിക്കുന്ന തമിഴ്‌നാട് സ്വദേശി ജോസ് എന്ന ഗണേഷി(47)നെയാണ് നാട്ടുകാര്‍ പിടികൂടി പൊലിസില്‍ ഏല്‍പ്പിച്ചത്.  ഈങ്ങാപ്പുഴ ടൗണില്‍ പ്രവര്‍ത്തിക്കുന്ന മിസ്റ്റ് ഹില്‍സ് ആശുപത്രിയുടെ ഫാര്‍മസിയിലാണ് ബുധനാഴ്ച പുലര്‍ച്ചെ മോഷണം നടന്നത്. ഫാര്‍മസിയുടെയും റിസപ്ഷന്റെയും പരിസരത്തുകൂടി ചുറ്റിക്കളിച്ചയാള്‍ ഫാര്‍മസിയുടെ വാതില്‍ തുറന്ന് അകത്ത് കടക്കുന്നതും പണം മോഷ്ടിക്കുന്നതുമെല്ലാം സി.സി.ടി.വി കാമറകളില്‍ പതിഞ്ഞിരുന്നു.
പുലര്‍ച്ചെ മൂന്നിനാണ് ഇയാള്‍ ആശുപത്രി വളപ്പിലെത്തുന്നത്. ഫാര്‍മസിയുടെ മേശയുടെ വലിപ്പ് തകര്‍ത്താണ് പണം കവര്‍ന്നത്. സി.സി.ടി.വി ദൃശ്യങ്ങള്‍ വാട്‌സാപ്പ് വഴി പ്രചരിപ്പിച്ചതോടെ മോഷ്ടാവിനെ തിരിച്ചറിയുകയായിരുന്നു. തുടര്‍ന്ന് പുതുപ്പാടി പഞ്ചായത്ത് ബസാര്‍ പള്ളിക്കുന്നില്‍ വാടകക്ക് താമസിക്കുന്ന ഇയാളെ നാട്ടുകാര്‍ പിടികൂടി താമരശ്ശേരി പൊലിസിന് കൈമാറിയത്.
പതിനയ്യായിരം രൂപയോളം നഷ്ടപ്പെട്ടതായാണ് ആശുപത്രി അധികൃതര്‍ പറയുന്നത്. ഇയാള്‍ നേരത്തെ താമസിച്ച പ്രദേശങ്ങളിലും മോഷണം നടന്നതായി നാട്ടുകാര്‍ പറയുന്നു. പ്രതിയെ ചോദ്യം ചെയ്ത ശേഷം അറസ്റ്റ് രേഖപ്പെടുത്തുമെന്ന് താമരശ്ശേരി പൊലിസ് അറിയിച്ചു.