നാദാപുരം: ഡി.ജി.പി ഓഫിസിനു മുന്‍പിലുണ്ടായ പൊലിസ് നടപടികള്‍ക്ക് ശേഷം തനിക്ക് നേരെയുണ്ടായ ആരോപണങ്ങള്‍ക്ക് വിശദീകരണവുമായി ജിഷ്ണുവിന്റെ അമ്മാവന്‍. ജിഷ്ണു പ്രണോയ്ക്ക് നീതി ലഭിക്കാന്‍ സഖാക്കളും സമൂഹവും ഇനിയും കൂടെയുണ്ടാവുമോ എന്ന ചോദ്യവുമായി ഒരു സ്വകാര്യ ഓണ്‍ലൈന്‍ ന്യൂസിന് നല്‍കിയ അഭിമുഖത്തിലാണ് ശ്രീജിത്ത് വിശദീകരണവുമായി ഇന്നലെ രംഗത്തെത്തിയത്.
ജിഷ്ണുവിന്റെ രക്തസാക്ഷിത്വത്തിന്റെയും അവനെ പെറ്റവയറിന്റെ ഹൃദയം നുറുക്കുന്ന ചോദ്യങ്ങളുടെയും വലയില്‍ മാത്രമാണ് താന്‍ പെട്ടുപോയത്. അല്ലാതെ കോണ്‍ഗ്രസിന്റെയോ ബി.ജെ.പിയുടെയോ മറ്റാരുടെയുമല്ല.
കേരളത്തിലെ എല്ലാ രാഷ്ട്രീയ പാര്‍ട്ടികളുടെയും നേതാക്കളും സാന്ത്വനവും ഐക്യദാര്‍ഢ്യവുമായി ജിഷ്ണുവിന്റെ വീട്ടില്‍ എത്തിയിട്ടുണ്ട്. നീതിക്ക് വേണ്ടിയുള്ള പോരാട്ടത്തില്‍ ഒരു രാഷ്ട്രീയ പാര്‍ട്ടിയുടെയും പങ്കാളിത്തം തങ്ങള്‍ ആവശ്യപ്പെട്ടിട്ടില്ലെന്നും ശ്രീജിത്ത് പറഞ്ഞു .
പതിനഞ്ച് വര്‍ഷം ദേശാഭിമാനിയുടെ എഡിറ്റോറിയല്‍ വിഭാഗത്തിലും കഴിഞ്ഞ പതിനൊന്ന് മാസമായി മാര്‍ക്കറ്റിങ് വിഭാഗത്തിലും ജോലി ചെയ്ത് വരികയായിരുന്നു. ഒരു വര്‍ഷം മുന്‍പ് പരസ്യത്തിന്റെ ലക്ഷങ്ങള്‍ തട്ടിയെന്നാണ് സോഷ്യല്‍ മീഡിയയിലെ പ്രചാരണം. കള്ളനെ എന്തിന് പണപ്പെട്ടി ഏല്‍പ്പിച്ചു. എന്ന മറുചോദ്യം ഉണ്ടായാല്‍ ദേശാഭിമാനി പ്രവര്‍ത്തകര്‍ സംശയത്തിന്റെ നിഴലില്‍ വരും. ഈ സാഹചര്യം ഒഴിവാക്കാനാണ് രാജിവച്ചതെന്നും ശ്രീജിത്ത് പറയുന്നു.
താന്‍ നെഹ്‌റു കോളജിന്റെ ഏജന്റ്് ആണെന്ന നെറികെട്ട നുണയും പ്രചരിപ്പിച്ചു. ഇക്കാര്യങ്ങള്‍ പാര്‍ട്ടിയെ ബോധ്യപ്പെടുത്തും. ചെങ്കൊടി ഇന്നും നെഞ്ചേറ്റുന്നു. അത് മരണം വരെ തുടരുമെന്നും അഭിമുഖത്തില്‍ പറയുന്നു.