തലശ്ശേരി: ബിസിനസ് വിപുലീകരണത്തിനു വേണ്ടി പണം വാങ്ങി വഞ്ചിച്ചെന്ന് മുഖ്യമന്ത്രിക്ക് പരാതി.
തലായി മാക്കൂട്ടത്തെ പ്രസ് വളപ്പില്‍ വീട്ടില്‍ പി.വി സാജിദാണ് തിരുവങ്ങാട്ടെ ജിതേന്ദ്രനാഥിനും ഭാര്യക്കുമെതിരെ പരാതി നല്‍കിയത്. തന്റെ പക്കല്‍ നിന്നും മകളുടെ ഭര്‍ത്താവില്‍ നിന്നും നാല് ലക്ഷം രൂപ ജിതേന്ദ്രനാഥും ഭാര്യയും കൂടി വാങ്ങി വഞ്ചിച്ചെന്നാണ് പരാതി. അയല്‍വാസികളാണ് ഇവരെന്നും മുഖ്യമന്ത്രിക്ക് നല്‍കിയ പരാതിയില്‍ പറയുന്നു. പണം തിരിച്ചു ചോദിക്കുമ്പോള്‍ വ്യാജപരാതി നല്‍കി ഭീഷണിപ്പെടുത്തുന്നതായും പരാതിയില്‍ പറയുന്നു.
പണം തിരിച്ചു തരാമെന്നു പറഞ്ഞ് പ്രതികളുടെ വീട്ടിലെത്തിയ സമയം മദ്യപിച്ചു കൊണ്ടിരുന്ന ജിതേന്ദ്രനാഥ് സ്വയം കയ്യില്‍ കുത്തി മുറിവേല്‍പ്പിക്കുകയും അത് പരാതിക്കാരായ ഞങ്ങള്‍ ചെയ്തതാണെന്ന വ്യാജേന കള്ളക്കേസ് കൊടുക്കുകയും ചെയ്തു. എന്നാല്‍ ജിതേന്ദ്രനാഥ് തന്റെ മകളുടെ ഭര്‍ത്താവിന്റെ ഉമ്മയെ മുഖത്തടിക്കുകയും മര്‍ദിക്കുകയും ചെയ്‌തെങ്കിലും പൊലിസ് കേസെടുത്തില്ലെന്നും പരാതിയില്‍ ചൂണ്ടിക്കാട്ടുന്നു. പ്രതിയായ ജിതേന്ദ്രനാഥ് ഫോണ്‍ ചെയ്ത് വധഭീഷണി മുഴക്കുന്നതായും പരാതിയുണ്ട്.