ന്യൂഡല്‍ഹി: വെള്ളത്തിന്റെ പ്രശ്‌നം മൂലം ഡല്‍ഹിയില്‍ നിന്ന് ന്യൂയോര്‍ക്കിലേക്കുള്ള എയര്‍ ഇന്ത്യ വിമാനം പുറപ്പെട്ടില്ല. 300 യാത്രക്കാരുമായി ഡല്‍ഹിയില്‍ നിന്ന് പുറപ്പെടാന്‍ തുടങ്ങവേയാണ് വിമാനത്തില്‍ വെള്ളം വിതരണം തകരാറിലായതായി ശ്രദ്ധയില്‍പ്പെട്ടത്.

ഇതോടെ യാത്രക്കാരെയെല്ലാം സമീപത്തെ ഹോട്ടലിലേക്ക് മാറ്റി. ഇന്നു വൈകിട്ട് അഞ്ചു മണിയോടെ പ്രശ്‌നം പരിഹരിച്ച് വിമാനം പുറപ്പെടാനാണ് പദ്ധതി. പുലര്‍ച്ചെ 1.40 നാണ് വിമാനം പുറപ്പെടേണ്ടിയിരുന്നത്. പകരം വിമാനം ഏര്‍പ്പാടാക്കാന്‍ ശ്രമം നടത്തിയെങ്കിലും ലഭ്യമായില്ല.

രാവിലെ ആറു മണി വരെ യാത്രക്കാരെല്ലാം വിമാനത്തില്‍ തന്നെ കാത്തിരുന്നുവെന്നും പിന്നീടാണ് ഹോട്ടലിലേക്ക് മാറ്റിയതെന്നും യാത്രക്കാര്‍ പറഞ്ഞു.