തിരുവനന്തപുരം: സ്റ്റുഡന്റ് നഴ്‌സസ് അസോസിയേഷന്‍ ഓഫ് ഇന്ത്യ സംഘടിപ്പിക്കുന്ന ദക്ഷിണ മേഖല കലോത്സവം ഇന്നും നാളെയുമായി മെഡിക്കല്‍ കോളജ് ഓഡിറ്റോറിയത്തിലും നഴ്‌സിങ് കോളജ് ക്യാംപസിലുമായി നടക്കുമെന്ന് അസോസിയേഷന്‍ പ്രതിനിധികള്‍ വാര്‍ത്താസമ്മേളനത്തില്‍ അറിയിച്ചു. കലോത്സവം കില ചെയര്‍മാന്‍ ബി. ശിവന്‍കുട്ടി ഉദ്ഘാടനം ചെയ്യും.
അഞ്ച് വേദികളിലായി നടക്കുന്ന കലാമത്സരത്തില്‍ 1500ഓളം നേഴ്‌സിങ് വിദ്യാര്‍ഥികള്‍ പങ്കെടുക്കും. കലാമത്സരങ്ങള്‍ക്ക് പുറമെ ക്വിസ് മത്സരങ്ങള്‍, സെമിനാറുകള്‍, ചിത്രപ്രദര്‍ശം എന്നിവയിലും മത്സരങ്ങള്‍ ഉണ്ടാകും. മത്സര വിജയികള്‍ക്ക് അഞ്ചിന് നടക്കുന്ന സമാപന സമ്മേളനത്തില്‍ അവാര്‍ഡുകള്‍ വിതരണം ചെയ്യും.
വാര്‍ത്താസമ്മേളനത്തില്‍ അസോസിയേഷന്‍ ഭാരവാഹികളായ മുഹമ്മദ് റാഫി, പി.എ ആദര്‍ശ്, നബീല്‍ നജിം, ലിബിന്‍ ബാബു, എം.ജി ഗോകുല്‍, ജഗില്‍ ചന്ദ്രന്‍ പങ്കെടുത്തു.