നാദാപുരം: യുവതിയുടെ ധീരത നാലു വയസുകാരന്റെ ജീവന്‍ രക്ഷിച്ചു. കളിച്ചുകൊണ്ടിരിക്കെ വെള്ളക്കുഴിയില്‍ വീണ പറമ്പന്‍ കുളങ്ങര ബഷീറിന്റെ മകന്‍ മുഹമ്മദ് (4 ) ആണ് അയല്‍വാസിയായ യുവതിയുടെ ധീരതയില്‍ രക്ഷപ്പെട്ടത്.
അയല്‍വാസികളായ ബഷീറിന്റെ മകന്‍ മുഹമ്മദും നജ്മയുടെ മൂന്നു വയസുള്ള മകനും ഇന്നലെ വൈകിട്ടു വീട്ടുപറമ്പില്‍ കളിച്ചുകൊണ്ടിരിക്കുന്നതിനിടെയാണ് അപകടമുണ്ടായത്. പറമ്പിനു താഴെയുള്ള ആഴംകൂടിയ വെള്ളക്കെട്ടിലേക്ക് മുഹമ്മദ് വീഴുകയായിരുന്നു. ശബ്ദംകേട്ട് ഓടിയെത്തിയ നജ്മ വെള്ളത്തില്‍ മുങ്ങിത്താഴുകയായിരുന്ന മുഹമ്മദിനെയാണു കണ്ടത്. ഉടന്‍ തന്നെ വെള്ളത്തിലേക്ക് എടുത്തുചാടിയ യുവതി കുട്ടിയെ കരയിലെത്തിക്കുകയായിരുന്നു. പറമ്പന്‍കുളങ്ങര സിദ്ദീഖിന്റെ ഭാര്യയാണ് നജ്മ.