അമ്പലപ്പുഴ: വീടും വീട്ടുപകരണങ്ങളും കത്തിനശിച്ചു. പുന്നപ്ര വടക്ക് പഞ്ചായത്ത് ഒന്നാം വാര്‍ഡില്‍ വാടയ്ക്കല്‍ ആറാട്ട്കുളങ്ങരയില്‍ മേരിദാസിന്റെ വീടിനുള്ളിലാണ് കഴിഞ്ഞ ദിവസം രാത്രി 12ഓടെ തീ ആളിപ്പടര്‍ന്നത്.
പുക ഉയരുന്നത് കണ്ട് വീട്ടുകാര്‍ നോക്കിയപ്പോള്‍ മുറിക്കുള്ളില്‍ തീ ആളിപ്പടരുകയായിരുന്നു. വിദേശത്ത് ജോലി ചെയ്യുന്ന മേരിദാസിന്റെ ഭാര്യ മേരി ഗ്രേസിയും മൂന്ന് മക്കളുമായിരുന്നു ഇതേ സമയം വീട്ടിലുണ്ടായിരുന്നത്. വീടിന്റെ മേല്‍കൂരയുടെ വാര്‍പ്പിന്റെ പ്ലാസ്റ്റര്‍ അടര്‍ന്ന് വീണ് വീട്ടുകാര്‍ക്ക് നിസാര പരുക്കേറ്റു.
ടി വി, വീട്ടു ഉപകരണങ്ങള്‍, വസ്ത്രങ്ങള്‍ എന്നിവയും കത്തിനശിച്ചു. സമീപവാസികള്‍ എത്തിയാണ് തീ പൂര്‍ണമായി അണച്ചത്. തീ പടരാനുള്ള കാരണം വ്യക്തമല്ല. രണ്ടു ലക്ഷം രൂപയുടെ നഷ്ടം കണക്കാക്കുന്നു.