കിഴിശ്ശേരി: നീരുട്ടിക്കല്‍ അങ്ങാടിയില്‍ ഓട്ടോ ഗ്യാരേജില്‍ മോഷണം. നട്ടുച്ചക്ക് യുവാവ് ക്യാഷ് കൗണ്ടറില്‍നിന്നും പണം കവര്‍ന്നു. നിരീക്ഷണ കാമറയില്‍ പതിഞ്ഞ ദൃശ്യത്തിന്റെ സഹായത്തോടെ പൊലിസ് മോഷ്ടാവിനെ കണ്ടെത്താനുള്ള ശ്രമം ഊര്‍ജിതമാക്കി.
കിഴിശ്ശേരി നീരുട്ടിക്കല്‍ അങ്ങാടിയില്‍ മഞ്ചേരി സ്വദേശി കള്ളാടി ത്തൊടി റിയാസിന്റെ ഉടമസ്ഥതയിലുള്ള കെ.ടി.എസ് ഓട്ടോ ഗ്യാരേജിലാണ് നട്ടുച്ചക്ക് മോഷണം നടന്നത്. തിങ്കളാഴ്ച ഉച്ചക്ക് കടയുടമ ഭക്ഷണം കഴിക്കാന്‍ പോയ സമയത്തായിരുന്നു മോഷണം. മോഷ്ടാവ് കൗണ്ടറില്‍ നിന്നും പതിനായിരത്തോളം രൂപയും പഴ്‌സുമായി കടന്നു കളഞ്ഞു. എന്നാല്‍ മോഷണ രംഗം മുഴുവനും കടയില്‍ സ്ഥാപിച്ചിരുന്ന സി.സി.ടി.വിയില്‍ പതിഞ്ഞു. ദൃശ്യങ്ങളുള്‍പ്പെടെ ഉടമ കൊണ്ടോട്ടി പൊലിസില്‍ പരാതി നല്‍കി.
പരിസരത്തെ നിരവധി സ്ഥാപനങ്ങളിലും ഇത്തരത്തില്‍ കഴിഞ്ഞ കുറച്ചു ദിവസങ്ങളിലായി മോഷണം നടന്നിരുന്നു.