പട്‌ന: ഭാര്യാപിതാവിന് ലോക്‌സഭയില്‍ മത്സരിക്കാന്‍ സീറ്റ് നല്‍കിയതിനെതിരേ തേജ്പ്രതാപ് ഉയര്‍ത്തിയ കലാപം ആര്‍.ജെ.ഡിയിലും പാര്‍ട്ടി അധ്യക്ഷന്‍ ലാലുപ്രസാദ് യാദവിനും തലവേദനയാകുന്നു.

ആര്‍.ജെ.ഡിയുടെ വിദ്യാര്‍ഥി വിഭാഗത്തില്‍നിന്ന് രാജിവയ്ക്കുകയാണെന്ന് പ്രഖ്യാപിച്ച തേജ് പ്രതാപ്, ഭാര്യാപിതാവ് ചന്ദ്രികാ റായ് മത്സരിക്കുന്ന സരണ്‍ ലോക്‌സഭാ മണ്ഡലത്തില്‍നിന്ന് മത്സരിച്ചേക്കുമെന്ന വാര്‍ത്തയും പുറത്തുവന്നു. ഇത് ലാലുവിന്റെ കുടുംബത്തെ തന്നെ ഞെട്ടിച്ചിരിക്കുകയാണ്. തേജ്പ്രതാപ് വിവാഹ മോചനത്തിന് ശ്രമിക്കുന്നതിനിടയിലാണ് അദ്ദേഹത്തിന്റെ ഭാര്യാപിതാവ് ചന്ദ്രികാ റായിക്ക് മത്സരിക്കാന്‍ സീറ്റ് നല്‍കിയത്. ഇതിനെതിരേ കലാപമുയര്‍ത്തിയാണ് ആര്‍.ജെ.ഡിയുടെ വിദ്യാര്‍ഥി വിഭാഗത്തില്‍നിന്ന് തേജ്പ്രതാപ് രാജിവച്ചത്.

ആര്‍.ജെ.ഡി എം.എല്‍.എയായ ചന്ദ്രികാ റായിക്ക് സീറ്റ് നല്‍കരുതെന്ന് ലാലുവിന് പകരക്കാരനായി പാര്‍ട്ടി ചുമതല വഹിക്കുന്ന സഹോദരന്‍ തേജസ്വി യാദവിനോട് തേജ് പ്രതാപ് നേരത്തെ തന്നെ ആവശ്യപ്പെട്ടിരുന്നു. ഇത് അംഗീകരിക്കാതിരുന്നതോടെയാണ് ഭാര്യാപിതാവിനെതിരേ മത്സരിക്കുമെന്ന വെല്ലുവിളി ഉയര്‍ത്തിയത്.