തിരുവനന്തപുരം: ജനാധിപത്യത്തിന്റെയും മതേതരത്വത്തിന്റെയും കാവലാളാണ് രാഹുല്‍ ഗാന്ധിയെന്ന് കെ.പി.സി.സി മുന്‍ പ്രസിഡന്റ് എം.എം ഹസ്സന്‍. തിരുവനന്തപുരം ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി ശശി തരൂരിന്റെ പേട്ടയില്‍ നടന്ന കണ്‍വന്‍ഷന്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജനാധിപത്യത്തിന്റെയും മതേതരത്വത്തിന്റെയും ആരാച്ചാരായി മോദി മാറിയപ്പോഴാണ് ഇവയുടെ കാവലാളായി രാഹുല്‍ ഗാന്ധി വന്നത്. രാജ്യത്തിന്റെ ചൗക്കീദാറെന്ന് അവകാശപ്പെട്ട മോദി കൊള്ളക്കാരനായി മാറി.
എന്നാല്‍ മതേതരത്വത്തിന്റെ സാക്ഷാല്‍ ചൗക്കീദാര്‍ രാഹുല്‍ ഗാന്ധിയാണ്. രാജ്യത്തെ പൊതുമേഖലാ ബാങ്കുകള്‍ കൊള്ളയടിക്കാന്‍ തുറന്നിട്ടു കൊടുക്കുകയും ജനങ്ങള്‍ക്കുമേല്‍ നികുതി ചുമത്തി കൊള്ളയടിക്കുകയും ചെയ്ത നരേന്ദ്ര മോദിയുടെ കൊള്ളക്കാരുടെ ഭരണത്തില്‍ നിന്നും കേരളത്തില്‍ പിണറായി വിജയന്റെ നേതൃത്വത്തിലുള്ള കൊലയാളി ഭരണത്തില്‍ നിന്നും നാടിനെ മോചിപ്പിക്കാന്‍ രാഹുല്‍ ഗാന്ധിക്കും കോണ്‍ഗ്രസിനും മാത്രമേ കഴിയൂവെന്നും ഹസ്സന്‍ പറഞ്ഞു.