തളിപ്പറമ്പ്: നിരന്തരം ബൈക്കുകള്‍ മോഷ്ടിക്കുന്ന പതിനേഴുകാരന്‍ തളിപ്പറമ്പ് പൊലിസിന്റെ പിടിയില്‍. പുളിമ്പറമ്പ് സ്വദേശിനി നാരായണിക്കുട്ടിയുടെ വീട്ടുമുറ്റത്ത് നിര്‍ത്തിയിട്ട ബൈക്ക് മോഷ്ടിച്ച കേസിലാണ് അയല്‍വാസിയായ പതിനേഴുകാരന്‍ പിടിയിലായത്. ഇക്കഴിഞ്ഞ 16ന് രാത്രിയാണ് നാരായണിക്കുട്ടിയുടെ മകന്‍ ചിത്തരഞ്ജന്റെ ബൈക്ക് മോഷണം പോയത്. ബൈക്കിന്റെ പച്ചനിറം പിന്നീടു സ്‌പ്രേ പെയിന്റുപയോഗിച്ച് മാറ്റി. പഴയ ബൈക്കിന്റെ നമ്പര്‍ പ്ലേറ്റ് അടര്‍ത്തി ഇതില്‍ ഘടിപ്പിച്ചായിരുന്നു കറക്കം. ഇന്നലെ രാവിലെയാണ് എസ്.ഐ പി.എ ബിനുമോഹന്‍ മോഷ്ടിച്ച ബൈക്കും സ്വന്തമെന്ന് പറയുന്ന ബൈക്കും സഹിതം പതിനേഴുകാരനെ പിടികൂടിയത്. ഇയാള്‍ നേരത്തെ ചിറവക്കില്‍ നിന്നു ബൈക്ക് മോഷ്ടിച്ച് വില്‍പ്പന നടത്തിയിരുന്നു. തളിപ്പറമ്പിലെ വര്‍ക്ക്‌ഷോപ്പില്‍ മെക്കാനിക്കാണ് 17കാരന്‍.