മാള: പ്രായപൂര്‍ത്തിയാകാത്ത പെണ്‍കുട്ടിയോട് ബസില്‍ വച്ച് ലൈംഗികാതിക്രമം കാണിച്ച ബസ് കണ്ടക്ടര്‍ പിടിയില്‍. മാള കൊടുങ്ങല്ലൂര്‍ റൂട്ടില്‍ സര്‍വിസ് നടത്തുന്ന സ്വകാര്യ ബസിലെ കണ്ടക്ടര്‍ വലിയപറമ്പ് സ്വദേശി കളത്തില്‍ ബാബു(19) ആണ് അറസ്റ്റിലായത്.
കഴിഞ്ഞ വര്‍ഷം ഒക്‌ടോബര്‍ 12 നാണ് കേസിനാസ്പദമായ സംഭവം നടന്നത്. സംഭവത്തിന് ശേഷം ബസുടമയുടെ സഹായത്തോടെ രക്ഷപെട്ട പ്രതി എറണാകുളം, കോട്ടയം ഭാഗങ്ങളില്‍ ഒളിവില്‍ കഴിഞ്ഞു വരികയായിരുന്നു.
തെരഞ്ഞെടുപ്പിനോട് അനുബന്ധിച്ചുള്ള സുരക്ഷാ ക്രമീകരണങ്ങളുടെ ഭാഗമായി കേസില്‍പെട്ട് ഒളിവില്‍ കഴിയുന്ന പ്രതികളെ അറസ്റ്റ് ചെയ്യുന്നതിന് ചാലക്കുടി ഡിവൈ.എസ്.പി കെ. ലാല്‍ജിയുടെ നേതൃത്വത്തില്‍ പ്രത്യേക അന്വേഷണ സംഘം രൂപീകരിച്ച് അന്വേഷണം നടത്തുകയായിരുന്നു.
അതിനിടയില്‍ ഇന്നലെ രാത്രി ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ആലുവയില്‍ നിന്ന് ഹൈദരാബാദിലേക്കുള്ള ട്രെയ്‌നില്‍ പരിശോധന നടത്തിയപ്പോള്‍ ഒറ്റപ്പാലത്തു വച്ചാണ് പ്രതിയെ അറസ്റ്റു ചെയ്തത്.
മാള എസ്.ഐ വിജയരാജന്‍, സിനീയര്‍ സി.പി.ഒമാരായ സതീഷന്‍, വി.വി ബിജു വാളൂരാന്‍, മിഥുന്‍ ആര്‍. കൃഷ്ണ, അന്‍സാര്‍ മോന്‍ എന്നിവര്‍ ചേര്‍ന്നാണ് അറസ്റ്റു ചെയ്തത്.