കുട്ടനാട്: പള്ളാത്തുരുത്തിയില്‍ അടിക്കടിയുണ്ടാകുന്ന കുടിവെള്ള പ്രശ്‌നത്തിന് പരിഹാരം കാണണമെന്നാവശ്യപ്പെട്ട്  സ്ത്രീകളും കുട്ടികളും പമ്പ്ഹൗസ് ഉപരോധിച്ചു. കഴിഞ്ഞ ഒരാഴ്ചയായി പ്രദേശത്ത് വാട്ടര്‍ അതോറിറ്റിയുടെ ജലവിതരണത്തില്‍ തടസങ്ങള്‍ നേരിടുന്നു.
നാട്ടുകാര്‍ പലതവണ വിവരം അധികൃതരെ അറിയിച്ചിട്ടും യാതൊരു നടപടിയുമുണ്ടായില്ല. തുടര്‍ന്ന് പ്രദേശവാസികള്‍ തന്നെ നടത്തിയ അന്വേഷണത്തില്‍ കുടിവെള്ളമെത്താത്തത് എന്താണെന്ന്  കണ്ടു പിടിക്കുകയായിരുന്നു. പള്ളാത്തുരുത്തി പാലത്തിന് സമീപമുള്ള പമ്പ് ഹൗസില്‍ നിന്നുമാണ് കൈനകരി ഭാഗത്തേക്കും പള്ളാത്തുരുത്തി പാലത്തിന്റെ തെക്കന്‍ പ്രദേശങ്ങളിലും വെള്ളം എത്തിച്ചിരുന്നത്. എന്നാല്‍ പമ്പ് ഹൗസിലെ ഒരു മോട്ടോര്‍ തകരാറിലായതിനെ തുര്‍ന്ന്  മുഴുവന്‍ വെള്ളവും ഓപ്പറേറ്റര്‍ കൈനകരി ഭാഗത്തേക്ക് കടത്തിവിടുകയായിരുന്നു.
പ്രശ്‌നത്തിന് പരിഹാരം കാണണമെന്നാവശ്യപ്പെട്ട് അധികൃതരെ സമീപിച്ച് മടുത്ത പ്രദേശവാസികള്‍ ഇന്നലെ പുലര്‍ച്ചെ അഞ്ചുമണിയോടെ പമ്പ് ഹൗസ് ഉപരോധിക്കുകയായിരുന്നു.  അതിരാവിലെ ജീവനക്കാരന്‍ എത്തുത്തിന് മുന്‍പുതന്നെ സ്ത്രീകളും കുട്ടികളുമടങ്ങുന്ന സംഘം സമരവുമായി എത്തിയിരുന്നു.
തങ്ങള്‍ക്ക് ലഭിക്കേണ്ട വെള്ളം ടാപ്പ് തിരിച്ച് വെച്ച് കൈനകരിയിലേക്ക് തന്നെ വിടാന്‍ അനുവദിക്കില്ലെന്ന് പ്രതിഷേധക്കാര്‍ മുദ്രാവാക്യം മുഴക്കി. സമരം ശക്തമായതോടെ നെടുമുടി പോലീസ് സ്ഥലത്തെത്തി. പ്രശ്‌നത്തിന് ഉടന്‍ പരിഹാരം കാണാമെന്ന് ഉറപ്പ് നല്‍കിയതോടെ നാട്ടുകാര്‍ സമരം അവസാനിപ്പിച്ചു.