കാട്ടിക്കുളം: ബേഗൂര്‍ റെയ്ഞ്ചിലെ അപ്പപ്പാറയില്‍ സ്വഭാവിക വനവല്‍ക്കരണത്തിന്റെ മറവില്‍ വനം തീയിട്ട് നശിപ്പിച്ച് ഏകവിളത്തോട്ടം നിര്‍മിക്കാനുള്ള വനം വകുപ്പ് നടപടിക്കെതിരേ പ്രതിഷേധം കനക്കുന്നു. ഇതിനെതിരേ കേരള കര്‍ഷക സംഘം, ഫോറസ്റ്റ് വര്‍ക്കേഴ്‌സ് യൂനിയന്‍, സി.ഐ.ടി.യു എന്നിവയുടെ സംയുക്താഭിമുഖ്യത്തില്‍ നാളെ ഫോറസ്റ്റ് ഓഫിസ് മാര്‍ച്ച് നടത്താനൊരുങ്ങുകയാണ്.
50 വര്‍ഷങ്ങള്‍ക്ക് മുമ്പ് സ്വഭാവിക വനം മുറിച്ച് മാറ്റി അവശേഷിക്കുന്നവ തീയിട്ട് നശിപ്പിച്ച് തേക്കും, യൂക്കാലിയും നട്ടുപിടിപ്പിച്ച അതേ രീതിയാണ് അപ്പപ്പാറ വനത്തിലും നടത്തുന്നത്. യൂക്കാലി മുറിച്ചു മാറ്റിയ 26 ഹെക്ടര്‍ സ്ഥലത്തെ സ്വഭാവിക മരതൈകളും അമൂല്യ ഔഷധ സസ്യങ്ങളും മണ്ണിലെ സൂക്ഷ്മാണുക്കളെയും തീയിട്ട് നശിപ്പിച്ചാണ് പ്രവര്‍ത്തി നടത്തുന്നത്. ഇതെല്ലാം വനം വകുപ്പിലെ ഉന്നതരുടെ ശുപാര്‍ശയിലാണ്.
തേക്കും, യൂക്കാലിയും മുറിച്ചുമാറ്റി സ്വഭാവിക വനവല്‍ക്കരണം നടത്തണമെന്നാവശ്യപ്പെട്ടുള്ള വയനാട് വന്യമൃഗശല്യ പ്രതിരോധ സമിതിയുടെ ശക്തമായ ഇടപെടലിനെ തുടര്‍ന്നാണ് ബേഗൂര്‍ റെയ്ഞ്ചിലെ തിരുനെല്ലി, അപ്പപ്പാറ, മുത്തുമാരി പ്രദേശങ്ങളിലെ യൂക്കാലി മുറിച്ചുമാറ്റിയത്. അവിടെ സ്വഭാവിക വനവല്‍ക്കരണത്തിന്റെ മറവില്‍ ഏകവിളത്തോട്ടം വെച്ചുപിടിപ്പിക്കുകയാണിപ്പോള്‍.
ആനതാരയുടേയും, അതീവലോല പ്രദേശത്തിന്റെയും പേരില്‍ തിരുനെല്ലിയിലെ ജനങ്ങളെ വനം വകുപ്പ് പീഡിപ്പിക്കുമ്പോഴാണ് ഈ നടപടി. ആനതാരയുടെ പേരില്‍ പനവല്ലി,-അപ്പപ്പാറ റോഡില്‍ ടാറിങ് പോലും വനം വകുപ്പ് അനുമതി നിഷേധിച്ചിരുന്നു. അതേ ആനതാരയിലാണ് പരിസ്ഥിതി നശിപ്പിച്ചുള്ള വനം വകുപ്പ് പ്രവൃത്തി.
ഈ സാഹചര്യത്തില്‍ പരിസ്ഥിതി നശിപ്പിക്കുന്ന വനം കത്തിക്കലും ഏകവിളത്തോട്ടവും വനമേഖലയിലെ കരാര്‍ വ്യവസ്ഥയും എന്ത് വിലകൊടുത്തും തടയും എന്ന് കര്‍ഷക സംഘം സെക്രട്ടറി ടി.എന്‍ ഹരീന്ദ്രന്‍, ഫോറസ്റ്റ് വര്‍ക്കേഴ്‌സ് യൂനിയന്‍, സി.ഐ.ടി.യു സെക്രട്ടറി സി.ആര്‍ ഷിബു സംയുക്ത പ്രസ്താവനയില്‍ പറഞ്ഞു.