തൃക്കാക്കര: ഏപ്രില്‍ 26 മുതല്‍ 30 വരെ തൃക്കാക്കര മുണ്ടംപാലത്ത് നടക്കുന്ന എസ്.കെ.എസ്.എസ്.എഫ് ജില്ലാ സമ്മേളനമായ മദീനപാഷന് ഹുദൈബിയ നഗരിയുടെ ഒരുക്കങ്ങളാരംഭിച്ചു. അഞ്ച് ദിവസങ്ങളിലായി നടക്കുന്ന മദീനപാഷന് വിപുലമായ ഒരുക്കങ്ങളാണ് നഗരിയില്‍ നടക്കുന്നത്. 30ന് വൈകിട്ട് ഏഴിന് നടക്കുന്ന മദീനപാഷന്റെ സമാപന സമ്മേളനവും സമസ്ത ജില്ലാ നേതാക്കള്‍ക്ക് നല്‍കുന്ന സ്വീകരണവും  വിജയമാക്കാനുള്ള ഊര്‍ജിതമായ പ്രവര്‍ത്തനത്തിലാണ് ജില്ലയിലെ സമസ്ത പ്രവര്‍ത്തകര്‍.
മത സാംസ്‌കാരിക - രാഷ്ട്രീയ രംഗത്തെ പ്രമുഖ നേതാക്കളും സമസ്തയുടേയും പോഷകസംഘടനകളുടേയും സംസ്ഥാന ജില്ലാ നേതാക്കളും സമാപന സമ്മേളനത്തില്‍ പങ്കെടുക്കും. സമാപന സമ്മേളനത്തില്‍ ജില്ലയുടെ വിവിധ പ്രദേശങ്ങളില്‍ നിന്നായി പ്രവര്‍ത്തകര്‍ എത്തിച്ചേരും. സമ്മേളന നഗരിയില്‍ സ്വാഗതസംഘം ഓഫിസിന്റെ പ്രവര്‍ത്തനം ആരംഭിച്ചു.
സമസ്ത ജില്ലാ വര്‍ക്കിങ് സെക്രട്ടറി അഷ്‌റഫ് ഹുദവി ഓഫിസ് ഉദ്ഘാടനം ചെയ്തു. തുടര്‍ന്ന് നടന്ന സ്വാഗതസംഘം കണ്‍വന്‍ഷന്‍ എസ്.കെ.എസ്.എസ്.എഫ് ജില്ലാ പ്രസിഡന്റ് സയ്യിദ് ഷെഫീഖ് തങ്ങള്‍ ഉദ്ഘാടനം ചെയ്തു. സ്വാഗതസംഘം വര്‍ക്കിങ് ചെയര്‍മാന്‍ ജഅ്ഫര്‍ ഷെരീഫ് വാഫി അധ്യക്ഷത വഹിച്ചു.