തിരുവനന്തപുരം: സംസ്ഥാനത്ത് വാഹന പരിശോധന കര്‍ശനമാക്കാന്‍ സംസ്ഥാന പൊലിസ് മേധാവി ലോക്‌നാഥ് ബെഹ്‌റ ജില്ലാ പൊലിസ് മേധാവികള്‍ക്ക് നിര്‍ദേശം നല്‍കി. ലോക്ക്ഡൗണില്‍ ഇളവുകള്‍ പ്രഖ്യാപിച്ചതിനെ തുടര്‍ന്ന് ഗതാഗതത്തിരക്കും റോഡപകടങ്ങളും വര്‍ധിച്ച സാഹചര്യത്തിലാണ് നിര്‍ദേശം.
ഹെല്‍മെറ്റ്, സീറ്റ് ബെല്‍റ്റ് എന്നിവ ഉപയോഗിക്കാത്തവര്‍ക്കും അമിതവേഗത്തിലും അപകടമുണ്ടാകുന്ന തരത്തിലും വാഹനം ഓടിക്കുന്നവര്‍ക്കും എതിരേ കര്‍ശന നടപടിയുണ്ടാകും. മാസ്‌ക് ധരിക്കാത്തവര്‍ക്കെതിരേയും നടപടി സ്വീകരിക്കും.
മാന്യമായും സുരക്ഷിതമായ രീതിയിലുമാണ് വാഹന പരിശോധന നടത്തേണ്ടത്. നിര്‍ദേശങ്ങള്‍ നടപ്പാക്കുന്നതിനും ദിനംപ്രതി റിപ്പോര്‍ട്ട് ശേഖരിക്കുന്നതിനും ട്രാഫിക് വിഭാഗം ഐ.ജിയെ ചുമതലപ്പെടുത്തിയിട്ടുണ്ട്.