മറയൂര്‍: മറയൂര്‍ 33 കെ.വി സബ് സ്റ്റേഷന്റെ നിര്‍മാണ പണികള്‍ തടസങ്ങള്‍ പരിഹരിച്ച് മുന്നേറുന്നു. ചിത്തിരപുരത്ത് നിന്ന് മറയൂരില്‍ 33 കെ.വി സബ് സ്റ്റേഷനിലേക്ക് വൈദ്യുതി ലൈന്‍ വലിക്കുന്ന പണിയും മറയൂരില്‍ സബ് സ്റ്റേഷന്റെ കെട്ടിട നിര്‍മാണവുമാണ് നടന്നുവരുന്നത്. വൈദ്യുതി പോസ്റ്റ് കുഴിച്ചിടുന്നതിനെതിരേ തേയില കമ്പനികളും പൊതുമരാമത്ത് വകുപ്പും തടസവാദങ്ങള്‍ ഉയര്‍ത്തിയെങ്കിലും അതെല്ലാം ചര്‍ച്ച നടത്തി പരിഹരിച്ചു.
വൈദ്യുതി വകുപ്പ് ഡപ്യൂട്ടി ചീഫ് എന്‍ജിനീയര്‍ ശശാങ്കന്‍ നായര്‍ കമ്പനി അധികൃതരുമായി ചര്‍ച്ച നടത്തി പ്രശ്‌നങ്ങള്‍ പരിഹരിച്ചു. നിലവില്‍ രാജമല മുതല്‍ വാഗവുരൈ വരെയുള്ള 17 കിലോമീറ്റര്‍ ദൂരം പോസ്റ്റുകള്‍ സ്ഥാപിച്ചു വരുന്നു. മൂന്ന് കോടി രൂപയാണ് ഇതിന്റെ ചെലവ്. മൂന്നാര്‍ ടൗണില്‍ ലക്ഷ്മി എസ്റ്റേറ്റില്‍ 6633 കെ.വി സബ് സ്റ്റേഷന്‍ സ്ഥാപിച്ച് അവിടെ നിന്ന് മറയൂരിലേക്ക് 33 കെ.വി ലൈന്‍ എത്തിക്കുവാനാണ് പദ്ധതി ലക്ഷ്യമിടുന്നത്. വാഗവുരൈ മുതല്‍ കോഫി സ്റ്റോര്‍ വരെ മറയൂര്‍ - മൂന്നാര്‍ സംസ്ഥാന പാതയിലൂടെയും കോഫി സ്റ്റോര്‍ മുതല്‍ മറയൂര്‍ വരെ നിലവിലെ ചിന്നവര ഭാഗം വഴിയുമാണ് പുതിയ ലൈന്‍ വരുന്നത്. ഈ മേഖലയില്‍ വനഭൂമിയുള്ളതിനാലാണ് പഴയ ലൈനിലൂടെ തന്നെ കൊണ്ടുവരുന്നത്. വാഗ വുരൈ മറയൂര്‍ ലൈന്‍ വലിക്കുന്നതിനുള്ള ഇ-ടെന്‍ഡര്‍ മാര്‍ച്ച് 29നാണ് തുറക്കുന്നത്.
ചിത്തിരപുരം ലക്ഷ്മി എസ്റ്റേറ്റ് വരെയുള്ള 66 കെ.വി ലൈനിന്റെ സര്‍വേയും ആരംഭിച്ചു. മറയൂരില്‍ സബ് സ്റ്റേഷന്റെ നിര്‍മാണം പൂര്‍ത്തിയായി വരുന്നു. ഇവിടെ ട്രാന്‍സ്‌ഫോര്‍മര്‍ സ്ഥാപിക്കുവാനുള്ള നടപടിക്രമങ്ങളും നടന്നുവരുന്നു. ഒരു വര്‍ഷം കൊണ്ട് വൈദ്യുതി ലൈന്‍ മറയൂരില്‍ എത്തിച്ച് സബ് സ്റ്റേഷന്റെ പ്രവര്‍ത്തനം ആരംഭിക്കുവാന്‍ കഴിയുന്ന പ്രതീക്ഷയിലാണ് അധികൃതര്‍.