എടപ്പാള്‍: സംസ്ഥാന പാതയില്‍ അമിത വേഗവും മത്സര ഓട്ടവും നിരന്തരമായ അപകടങ്ങള്‍ക്ക് കാരണമായതിനെ തുടര്‍ന്ന് വാഹനങ്ങളുടെ അമിതവേഗത്തിന് തടയിടാന്‍ സ്ഥാപിച്ച കാമറക്കണ്ണുകളെ വെട്ടിച്ച് സ്വകാര്യ ലിമിറ്റഡ് സ്റ്റോപ് ബസുകള്‍.
അമിത വേഗത്തിലെത്തുന്ന ബസുകള്‍ കാമറകള്‍ എത്തുന്നതോടെ പെട്ടെന്ന് എതിര്‍വശത്ത് കൂടി കടന്ന് പോയി കാമറയെ വെട്ടിക്കുകയാണ് ചെയ്യുന്നത്.
ഈ കുതിച്ചോട്ടവും പെട്ടെന്നുള്ള വെട്ടിക്കലും വലിയ അപകടങ്ങളിലേക്കാണ് നയിക്കുന്നത്. നടുവട്ടം,കാളാച്ചാല്‍, ചിയ്യാനൂര്‍ പാടം തുടങ്ങി വിവിധ ഭാഗങ്ങളില്‍ സ്പീഡ് കാമറകള്‍ സ്ഥാപിച്ചിട്ടുണ്ടണ്ട്.
അമിതവേഗത്തില്‍ സഞ്ചരിക്കുന്ന ബസുകള്‍ ഉള്‍പ്പെടെയുള്ള വാഹനങ്ങളുടെ ചിത്രം പകര്‍ത്തി ചിത്രം സഹിതം പിഴ ഈടാക്കുന്ന സംവിധാനമാണിത്.
  എന്നാല്‍ അമിതവേഗത്തില്‍ സര്‍വിസ് നടത്തുന്ന ബസുകള്‍ കാമറയ്ക്കു സമീപമെത്തുമ്പോള്‍ അരികുമാറി സഞ്ചരിക്കുമ്പോള്‍ ക്യാമറയില്‍ പതിയില്ലെന്ന്  മനസിലാക്കിയാണ് ലിമിറ്റഡ് സ്റ്റോപ് ബസുകള്‍ ഈ തന്ത്രം പയറ്റുന്നത്.